Veiðin fór vel af stað í Laxá í Mý

Karl Lúðvíksson skrifar 30. maí 2023 08:23

Árni Friðleifsson með vænan urriða úr opnun Laxá í Mý

Veiði hófst í Laxá í Mý í gær og þrátt fyrir að það hafi verið nokkuð hvasst á köflum var veiðin ágæt þennan fyrsta dag og fiskurinn vel haldin.

Veiðin gekk samkvæmt okkar heimildum vel þennan fyrsta dag en flestar stangirnar voru að fá 5-15 fiska sem er virkilega fín veiði. Árni Friðleifsson fyrrum formaður SVFR og Jóhann Jón Ísleifsson, betur þekktur sem Jonni gæd, voru komnir með níu fiska á morgunvaktinni. Flest svæðin voru að gefa ágætlega en rólegast var á Hamri og Brettingsstöðum. Við fáum eflaust fleiri fréttir að norðan en á miðvikudaginn hefst svo veiði í Laxárdalnum. Við bendum á að það eru lausar stangir þar 8-10. júní og svo í Caddishollið 10.-13. júní. Næstu lausu dagar í Mývatnssveit eru uppúr miðjun júlí.