„Maður verður sár að finna fyrir mis­munun í starfi“

Starfsfólk í grunnskólum sex sveitarfélaga lögðu niður störf í gær og í dag vegna kjaradeilu BSRB og Sambands íslenskra sveitarfélaga. Starfsfólk Starfsmannafélags Suðurnesja fundaði í ráðhúsi Reykjanesbæjar í morgun.  

„Maður verður sár og reiður af hverju manneskja í sömu stöðu og ég fær hærri laun. Að gera það nákvæmlega sama. Það er ein sem er í nákvæmlegu sömu prósentustöðu, við gerum nákvæmlega það sama en við vinnum bara í mismunandi námsveri. Þetta finnst mér bara alls ekki rétt og réttlátt,“ segir Aníta Ósk Georgsdóttir, stuðningsfulltrúi í grunnskóla. Mikill einhugur sé í starfsfólki. 

„Við erum alls ekki sátt hvernig staðan er og þetta er mismunun.“

Verst fyrir krakkana

Aníta segist vona að samið verði sem fyrst. Það sé leiðinlegt að þurfa að fara í verkfall til þess að það sé hlustað. „Þetta hefur áhrif á krakkana aðallega. Það er það sem er svo sárt, sérstaklega krakkana sem þurfa meiri ramma. Eins og ég sem vinn í námsveri með krökkum með allskonar greiningar. Þetta er mjög erfitt fyrir þau að geta ekki mætt í skólann eða fólkið sem það er vant að vera í kringum er ekki á staðnum það bara ruggar bátnum hjá þeim alveg eins og hjá okkur,“ segir Aníta. 

Trausti Björgvinsson, formaður Starfsmannafélags Suðurnesja, segir kröfurnar einfaldar. „Við erum að krefjast jafnra launa á við vinnufélaga okkar við sömu starfstöðvar sem eru að vinna nákvæmlega sömu störf.“ Trausti segist ekki trúa öðru en að Samband íslenskra sveitarfélaga komi til móts við félagsfólk BSRB sem fyrst. Hann vinnur sem húsvörður í grunnskóla og finnur því vel fyrir launamismuninum sjálfur. 

Umræðan snúist um þetta

„Staðan í skólunum er mjög slæm. Það er slæmur mórall á vinnustöðum út af þessu. Þetta skapar mikið ójafnrétti á milli vinnufélaga og umræðan hefur ekkert verið önnur í raun og veru upp á síðkastið en þetta. Hluti starfsfólksins er á hærri launum. Þetta munar sirka 128 þúsundum á árslaunum og þetta eru stórir peningar fyrir þetta fólk. Þetta er lægst launaða fólkið sem um ræðir hérna sem veltir hverri einustu krónu til að hafa í sig og á. Þarna er verið að slíta frá þeim þessa aura sem er ekki hægt,“ segir Trausti.

Bæjarstjóri Reykjanesbæjar vísaði kröfum starfsfólksins til Sambands íslenskra sveitarfélaga. „Þetta er mjög vont fyrir okkur og öll samfélög á Íslandi að þessi staða skuli vera uppi. Við höfum sagt að á meðan samningsumboðið er hjá Sambandi íslenskra sveitarfélaga að þá viljum við hvetja aðila til að gera allt sem þeir geta til að ná saman,“ segir Kjartan Már Kjartansson. Hann skilji kröfur starfsfólksins en tvær hliðar séu á öllum málum. 

Áhugavert að sjá áhrif verkfalla

Kjaradeilan er enn í hörðum hnút eftir árangurslaust samtal samninganefnda hjá ríkissáttasemjara á mánudag og ekki hefur verið boðað til nýs fundar. Sonja Ýr Þorbergsdóttir, formaður BSRB, segir áhugavert að sjá hvaða áhrif verkföllin muni hafa. 

„Sömuleiðis held ég að kannski bæjarstjórarnir og fulltrúar sveitarfélaganna finni betur fyrir því núna hvaða áhrif þetta hefur innan vinnustaðanna sjálfra og þá er spurning hvort þeir vilji ekki endurskoða þessa heildarhagsmuni í því ljósi.“