Eyjamenn unnu fyrsta leik liðanna í Vestmannaeyjum á laugardaginn, 33-27, og liðin mætast öðru sinni á Ásvöllum í kvöld.
Frá því úrslitakeppnin var sett á laggirnar tímabilið 1991-92 hefur liðið sem vann fyrsta leikinn í úrslitaeinvígi orðið Íslandsmeistari í 21 skipti af 27.
Liðið sem vann fyrsta leikinn í fyrstu fimm úrslitaeinvígunum varð Íslandsmeistari, eða allt þar til Aftureldingu mistókst að verða meistari 1997 eftir að hafa unnið fyrsta leikinn gegn KA.
Það gerðist svo þrjú ár í röð um aldamótin að liðið sem vann fyrsta leikinn í úrslitaeinvígi varð ekki meistari. Þessi óheppnu lið voru Fram 2000 (töpuðu fyrir Haukum), KA 2001 (töpuðu fyrir Haukum) og Valur 2002 (töpuðu fyrir KA).
ÍBV varð Íslandsmeistari í fyrsta sinn 2014 þrátt fyrir að hafa tapað fyrsta leiknum gegn Haukum. Eyjamenn tryggðu sér titilinn með sigri í eftirminnilegum oddaleik á Ásvöllum.
Afturelding varð svo ekki meistari 2016 þrátt fyrir að hafa unnið fyrsta leikinn gegn Haukum. Hafnfirðingar urðu meistarar eftir sigur í oddaleik á Ásvöllum.
Lið sem hafa unnið fyrsta leik í úrslitaeinvígi
- 1992: FH - meistari
- 1993: Valur - meistari
- 1994: Valur - meistari
- 1995: Valur - meistari
- 1996: Valur - meistari
- 1997: Afturelding - ekki meistari (KA)
- 1998: Valur - meistari
- 1999: Afturelding - meistari
- 2000: Fram - ekki meistari (Haukar)
- 2001: KA - ekki meistari (Haukar)
- 2002: Valur - ekki meistari
- 2003: Haukar - meistari
- 2004: Haukar - meistari
- 2005: Haukar - meistari
- 2009: Haukar - meistari
- 2010: Haukar - meistari
- 2011: FH - meistari
- 2012: HK - meistari
- 2013: Fram - meistari
- 2014: Haukar - ekki meistari (ÍBV)
- 2015: Haukar - meistari
- 2016: Afturelding - ekki meistari (Haukar)
- 2017: Valur - meistari
- 2018: ÍBV - meistari
- 2019: Selfoss - meistari
- 2021: Valur - meistari
- 2022: Valur - meistari
- 2023: ???
Nú er að sjá hvort Haukar nái að snúa á söguna og verða meistarar þrátt fyrir að hafa tapað fyrsta leiknum. Þeir geta einnig komið sér í sögubækurnar með því að verða fyrsta liðið sem endar í 8. sæti til að verða meistari.
Leikur Hauka og ÍBV hefst klukkan 18:00 og verður sýndur beint á Stöð 2 Sport. Upphitun Seinni bylgjunnar hefst klukkan 17:20.