Tryggvi Snær drjúgur í sigri Zaragoza

Fyrir leikinn í dag var Zaragoza í 13. sæti deildarinnar en Joventut í 7. sæti sem færir liðinu úrslitakeppnissæti. Zaragoza á hins vegar ekki möguleika á að ná efstu átta sætunum en er einnig í góðri fjarlægð frá fallliðunum.

Zaragoza var tveimur stigum yfir eftir fyrsta leikhluta í dag en átti frábæran annan leikhluta sem skilaði liðinu fjórtán stiga forskoti í hálfleik. Staðan þá 43-29.

Liðsmenn Joventut Barcelona reyndu að saxa á forskot Zaragoza eftir hlé en gekk brösuglega. Fyrir lokafjórðunginn var munurinn tólf stig og Tryggvi Snær og félagar í góðri stöðu. Í fjórða leikhluta náði lið Zaragoza síðan að sigla sigrinum í höfn. Munurinn fór mest niður í sjö stig en lengra komust gestirnir ekki. Lokatölur 87-77.

Tryggvi Snær átti fínan leik í liði Zaragoza. Hann spilaði tæpar tuttugu mínútur, skoraði 9 stig og tók sex fráköst.