Gerir ráð fyrir að spila áfram og segir engin særindi út í Keflavík

Körfuboltamaðurinn Hörður Axel Vilhjálmsson hætti sem leikmaður karlaliðs og þjálfari kvennaliðs Keflavíkur í gær. Bróðir hans hætti sem þjálfari karlaliðsins fyrr í vor en hann segir það hafa lítið að segja um ákvörðunina.

Frá árinu 2008 er Keflavík eina félagið sem Hörður Axel hefur leikið með hérlendis en þó með hléum þar sem hann lék erlendis um hríð. Hann hefur verið lykilmaður hjá liðinu síðustu ár og einnig náð góðum árangri sem þjálfari kvennaliðsins. Fjölskyldutengdar ástæður liggi hins vegar að baki ákvörðun gærdagsins.

„Ég á tvö lítil börn og eins og staðan er í dag, og er búin að vera síðustu fjögur ár, þá er ég að fara út af heimilinu klukkan svona fjögur, hálf fimm. Þau eru að koma úr leikskóla um fjögurleytið. Ég næ hálftíma á dag og mér finnst það bara ekki nóg. Ég var að eignast börn til að vera með þeim og eyða tíma með þeim,“ sagði Hörður Axel í samtali við Val Pál Eiríksson en viðtalið birtist í Sportpakka gærdagsins.

Hörður Axel segist gera ráð fyrir að halda áfram að spila en mun leggja þjálfaraflautuna á hilluna.

„Hvar það verður hef ég ekki hugmynd um. Mér fannst réttast gagnvart öllum að koma hreint fram við Keflavík og rifta áður en ég færi að spá og horfa í kringum mig,“ en Hörður segir ákvörðunina ekki hafa með ákvörðun bróður hans, Hjalta Þórs Vilhjálmssonar, að gera að hætta sem þjálfari Keflavíkur.

„Auðvitað myndi ég vilja spila fyrir bróður minn og við erum mjög nánir og allt það. Fyrst og fremst er ég að hugsa um sjálfan mig. Þetta eru búin að vera fjögur ár sem hann hefur þjálfað og auðvitað hefði margt getað farið betur en ég held að hann sé búinn að vinna mjög gott starf fyrir Keflavík,“ bætir Hörður Axel við og segir í sjálfu sér engin særindi vera gagnvart Keflavík.

Allt viðtalið við Hörð Axel má sjá í spilaranum hér fyrir ofan þar sem hann ræðir nánast framhaldið hjá honum og hvar hann er ekki til í að spila á næstu leiktíð.