PSG setur Messi í tveggja vikna agabann

Leikmenn PSG áttu að fá frí frá æfingum í gær og í dag, en eftir 3-1 tap liðsins gegn Lorient síðastliðinn sunnudag ákvað Cristophe Galtier, knattspyrnustjóri liðsins, að allir leikmenn ættu að mæta á æfingu.

Hinn 35 ára Messi var hins vegar hvergi sjáanlegur á æfingum þar sem hann ferðaðist til Sádi-Arabíu. Messi er sendiherra ferðamála fyrir Visit Saudi-Arabia og hafði ferðinni verið frestað í tvígang áður. 

Samkvæmt umfjöllun BBC um málið á Messi að hafa beðið um leyfi fyrir því að fara í ferðina, en því hafi verið hafnað.

Eins og áður segir hefur Messi nú verið settur í tveggja vikna agabann af PSG og mun hann því hvorki æfa né spila með félaginu næstu 14 daga.