Innlent

Segir þetta bara einn nagla í kistu Reykjavíkurflugvallar

Kristján Már Unnarsson skrifar
Orri Eiríksson, verkfræðingur og flugstjóri hjá Icelandair, sat í starfshópi innviðaráðherra um nýja byggð í Skerjafirði sem fulltrúi öryggisnefndar Félags íslenskra atvinnuflugmanna.
Orri Eiríksson, verkfræðingur og flugstjóri hjá Icelandair, sat í starfshópi innviðaráðherra um nýja byggð í Skerjafirði sem fulltrúi öryggisnefndar Félags íslenskra atvinnuflugmanna. Bjarni Einarsson

Sú ákvörðun innviðaráðherra og borgarstjóra að hefja uppbyggingu í Nýja Skerjafirði skerðir notagildi Reykjavíkurflugvallar og er einn naglinn í kistu vallarins, að mati talsmanns Félags íslenskra atvinnuflugmanna. Borgarstjóri segir að þarna rísi eftirsótt hverfi samkvæmt verðlaunaskipulagi.

Í fréttum Stöðvar 2 var rifjað upp að sjö ár eru frá því Hlíðarendahverfið var tekið undan flugvellinum. Það gerðist að lokum með dómi Hæstaréttar árið 2016, eftir talsverð átök. Núna er komið að því að taka næsta svæði til húsbygginga og það er ekki minna.

Ráðherra flugmála gaf grænt ljós.

„Það er allavega niðurstaðan okkar að það sé ekkert til fyrirstöðu að gera það,“ segir Sigurður Ingi Jóhannsson innviðaráðherra.

„Það tekur vissulega langan tíma. Það þurfi að fara þarna í jarðvegsframkvæmdir og aðra þætti, sem gefur okkur þá líka nægilegt tækifæri til þess að fara í hugsanlegar deiliskipulagsbreytingar,“ segir ráðherrann.

Teikning af fyrirhugaðri byggð.Reykjavíkurborg

Borgin hefur skipulagt 690 íbúðir í hverfinu.

„Áhuginn á hverfinu er sannarlega mikill. Þetta er líklega eitt verðlaunaðasta skipulag sem við höfum staðið fyrir, bæði innanlands og utan,“ segir Dagur B. Eggertsson borgarstjóri.

Starfshópur ráðherra telur raunar að byggðin muni að óbreyttu skerða nothæfi vallarins og að þörf sé á mótvægisaðgerðum. En munu þær fækka íbúðum í nýja hverfinu?

„Nei, það ætti ekki að þýða það,“ svarar borgarstjóri.

Dagur B. Eggertsson borgarstjóri.Bjarni Einarsson

Borginni í samvinnu við Isavia er falið að útfæra skipulag hverfisins með það að markmiði að tryggja flug- og rekstraröryggi vallarins.

„En ég held að við séum bara sammála um að gera það sem hægt er til þess að tempra áhrifin þannig að þetta geti farið saman,“ segir Dagur.

„Þessvegna er það niðurstaðan að þrátt fyrir að það sé staðreynd að þessi byggð muni hafa áhrif að með mótvægisaðgerðum sé það talið, af þessum hópi, hægt að bregðast við því á viðunandi hátt,“ segir Sigurður Ingi.

Sem innviðráðherra fer Sigurður Ingi Jóhannsson með flugmál, skipulagsmál og sveitarstjórnarmál.Bjarni Einarsson

Öryggisnefnd Félags íslenskra atvinnuflugmanna átti fulltrúa í nefndinni, Orra Eiríksson, en hann er flugstjóri hjá Icelandair og verkfræðingur.

-Hvernig líst ykkur atvinnuflugmönnum á þessa niðurstöðu?

„Illa,“ svarar Orri.

„Notagildi vallarins mun skerðast. Það munu verða erfiðleikar í áætlunarflugi. Þetta mun hafa veruleg áhrif á sjúkraflug.“

Notagildi sem varaflugvallar segir hann einnig skerðast.

„Þetta mun valda því að það þarf að nota Glasgow-flugvöll miklu oftar sem varaflugvöll fyrir Keflavíkurflugvöll,“ segir Orri.

Reykjavíkurflugvöllur þjónar hlutverki varaflugvallar fyrir millilandaflug.Vísir/Vilhelm

En hvenær sér borgarstjóri fram á það að vinnuvélar og byggingarkranar sjáist á Skerjafjarðarsvæðinu?

„Vinnuvélar ættu að geta sést strax á þessu ári. Byggingarkranar kannski á næsta og þá er ekki langt í fyrstu húsin,“ svarar Dagur.

„Að lokum er það pólitísk ákvörðun; ætla menn að skerða notagildi vallarins? Þetta er bara einn nagli í kistuna og það er kannski það sem menn vilja,“ segir Orri Eiríksson, fulltrúi í öryggisnefnd Félags íslenskra atvinnuflugmanna.

Hér má sjá ítarlegra viðtal við Orra Eiríksson:

Hér má sjá ítarlegra viðtal við Dag B. Eggertsson um niðurstöðuna:

Hér má sjá ítarlegra viðtal við Sigurð Inga Jóhannsson:

Reykjavíkurflugvöllur Fréttir af flugi Borgarstjórn Skipulag Samgöngur

Tengdar fréttir

Undirbúningur byggðar á fullt í Nýja Skerjafirði eftir nýja skýrslu

Starfshópur innviðaráðherra telur ekki þörf á að hætta við byggingarhugmyndir í Nýja Skerjafirði vegna áhrifa breytts vindafars á flugvöllinn. Hópurinn leggur til mögulegar mótvægisaðgerðir sem fela meðal annars í sér að takmarka hæð húsa í nýrri byggð. Innviðaráðuneytið og Reykjavíkurborg hafa tekið ákvörðun um að hafist verði handa við jarðvegsframkvæmdir og þar með undirbúning uppbyggingar.

Segir Reykjavíkurflugvöll gríðarlega mikilvægan varavöll millilandaflugs

Yfirflugstjóri Icelandair segir gríðarlega mikilvægt að geta notað Reykjavíkurflugvöll sem varavöll millilandaflugs og kallar eftir betri innviðum á vellinum. Hann spari Icelandair hálfan milljarð króna á ári í eldsneytiskostnað og dragi verulega úr útblæstri koltvísýrings.

Ný loftferðalög skerða skipulagsvald sveitarfélaga yfir flugvöllum

Ný ákvæði laga um loftferðir, sem Alþingi samþykkti á lokasprettinum í fyrrinótt, gera skipulagsreglur flugvalla rétthærri skipulagi sveitarfélaga. Bæði Samband íslenskra sveitarfélaga og Reykjavíkurborg lögðust gegn lagabreytingunni og sagði fráfarandi borgarstjórnarmeirihluti í Reykjavík hana kollvarpa því skipulagsvaldi sem sveitarfélög hefðu yfir flugvöllum.

Ráðherra neitar að afhenda landið en borgarstjóri segist hafa afsalið

Innviðaráðherra neitar borginni um að byggja í Skerjafirði og segir að hún fái ekki meira af landi Reykjavíkurflugvallar fyrr en nýr flugvallarkostur sé fundinn og uppbyggður. Borgarstjóri hafnar því að flugöryggi verði raskað og minnir á að borgin eigi landið.

Atvinnuflugmenn brýna Isavia að verja rekstraröryggi flugvallarins

Öryggisnefnd Félags íslenskra atvinnuflugmanna varar við því að nýjar húsbyggingar í Skerjafirði skapi hættu fyrir flugvélar á Reykjavíkurflugvelli með ókyrrð og sviptivindum. Isavia er hvatt til að setja fótinn niður og tryggja rekstraröryggi flugvallarins.

Borgin tekur tvær sneiðar til viðbótar af flugvellinum

Nýtt aðalskipulag Reykjavíkur gerir ráð fyrir að tvær sneiðar verði skornar af Reykjavíkurflugvelli á næstu þremur árum og að vellinum verði svo endanlega lokað eftir áratug, árið 2032.

Mest lesið


Fleiri fréttir

Sjá meira


×

Mest lesið