Gera ráð fyrir að ferðin til Akur­eyrar taki sólar­hring

Í samtali við fréttastofu lýsir Ásgeir Erlendsson, upplýsingafulltrúi Landhelgisgæslunnar, því hvernig olíunni er dælt yfir í Freyju, varðskip Landhelgisgæslunnar, en dælingin hófst í gær eftir að búið var að koma fyrir slöngum á milli skipanna í Steingrímsfirði.

„Við gerum sömuleiðis ráð fyrir því að bolskoðun kafara fari fram í dag, til þess að meta skemmdir. Síðan er sömuleiðis verið að sjóða fyrir tvö göt á skipinu, annars vegar í lest skipsins og síðan í vélarrúmi,“ segir Ásgeir.

Þegar þeirri vinnu lýkur er gert ráð fyrir að skipið verði tekið í tog til hafnar á Akureyri, sem gæti orðið í kvöld. Ferðin gæti tekið um sólarhring. Það fari þó eftir veðri og sjólagi.

„Að óbreyttu gerum við ráð fyrir því að seinna í dag hefjumst við handa við að flytja skipið inn á Akureyri.“

Og þegar það kemur þangað, verður ykkar aðkomu að málinu þá lokið?

„Já. Þá afhendum við bara eigendum skipsins skipið. Aðkomu Landhelgisgæslunnar er lokið þegar skipið kemur til hafnar.“