Sonur nýs lands­liðs­­þjálfara þakkar fyrir miðana og er spenntur að koma hingað til lands

Hinn 69 ára gamli Åge Hareide er nýr landsliðsþjálfari Íslands. Hann er mættur hingað til lands og hélt blaðamannafund í gær. Åge kom vel fyrir og segist spenntur að hefja störf. Sonur hans, Benedikt, er einnig spenntur ef marka má færslu hans á Twitter.

Benedikt vakti athygli Íslendinga í aðdraganda þess að faðir hans var ráðinn sem landsliðsþjálfari. Þar sagði hann einfaldlega að „Pabbi tekur við stjórn Íslenska landsliðsins.“

Nú í morgunsárið birti hann aðra færslu. Þar þakkar hann Ómari Smárasyni - sem fer með yfirstjórn samskiptamála hjá KSÍ - og sambandinu sjálfu fyrir miða á leiki Íslands í sumar.

„Að sjálfsögðu mæti ég í júní! Getum ekki beðið #ÁframÍsland,“ segir í tísti hans.

Eftir að hefja undankeppni Evrópumótsins 2024 á tveimur útileikjum þá leikur Ísland tvo heimaleiki í júní. Sá fyrri er gegn Slóvakíu á Þjóðhátíðardaginn sjálfan, 17. júní. Sá síðari er gegn Portúgal þremur dögum síðar, þann 20. júní.