Skip strandaði á Húna­flóa

Þetta kemur fram í tilkynningu frá Landhelgisgæslunni. Umrætt skip heitir Wilson Skaw og er áburðarflutningaskip. Var það á leið frá Hvammstanga til Hólmavíkur þegar það strandaði. Flutningaskipið er um 4000 brúttótonn og um 113 metra langt.

Varðskipið Freyja var statt í Skagafirði þegar tilkynning um strandið barst og var þegar í stað kallað út sem og áhöfn þyrlu Landhelgisgæslunnar. Þá var björgunarskip Slysavarnafélagsins Landsbjargar á Skagaströnd sömuleiðis beðið um að halda á vettvang.

Veður á strandstað er með besta móti og segir skipstjórinn að líðan áhafnarinnar sé góð. Gert er ráð fyrir að varðskipið Freyja verði komið á strandstað um kvöldmatarleitið en þá verða næstu skref metin. Von er á þyrlu Landhelgisgæslunnar á staðinn eftir rúma klukkustund. Landhelgisgæslan hefur gert Umhverfisstofnun viðvart um strandið.