Hjartveik börn fá 7,3 milljónir frá Domino's og Hrefnu Sætran

Góðgerðarpizzan er samstarfsverkefni Domino‘s og Hrefnu Sætran og hefur frá árinu 2013 safnað ríflega 59 milljónum fyrir ýmis góðgerðarverkefni. 

„Góðgerðarpizzan er orðið landsþekkt verkefni sem viðskiptavinir okkar hreinlega bíða eftir ár hvert. Það er einstaklega ánægjulegt að sjá viðtökurnar í ár á 10 ára afmæli verkefnisins en Góðgerðarpizzan er verkefni sem við erum einkar stolt af og þökkum starfsfólki okkar, MS, Ali og Hrefnu Sætran sérstaklega fyrir þetta langa og farsæla samstarf. Neistinn vinnur gríðarlega þarft og mikið starf fyrir hjartveik börn og aðstandendur þeirra og heiður að geta lagt þeim lið í því.“ segir Magnús Hafliðason, forstjóri Domino‘s á Íslandi.

Salan runnið óskipt til verkefna í 10 ár

Frá upphafi hefur öll sala góðgerðarpizzunnar ár hvert farið óskipt til verkefnis hvers árs en ekki óljós ágóði eins og oft vill til. Í ár gátu viðskiptavinir fylgst svo með söfnunni á dominos.is ásamt því sjá upplýsingar um hvað þeirra eigin pöntun væri að skila Neistanum í beinhörðum peningum. Samstarfaðilar Domino‘s í verkefninu voru Ali og MS sem styrktu verkefnið með hráefni líkt og fyrri ár.

Hrefna Sætran hefur unnið með Domino‘s að góðgerðarpizzunni frá upphafi og í ár var engin breyting þar á en Hrefna hefur frá upphafi gefið alla sína vinnu tengt verkefninu. Eftir frábæran árangur árið 2022 þar sem hvítlaukssósa var í stað pizzasósu var ákveðið að halda áfram með það þema í ár. Pizza árins 2023 var með hvítlaukssósu í stað hefðbundinnar pizzasósu, pepperoni, beikon sneiðum, spínati, grænum eplum, hunangi og truffluosti.

Fjölbreytt verkefni í gegnum tíðina

Domino‘s og Hrefna hafa unnið saman að verkefninu frá upphafi og þannig stutt við fjölbreytt verkefni með ýmsum hætti. Lögð hefur verið áhersla á að styrkja verkefni sem oft fá ekki nægilega athygli og áforma að nota fjármunina í áþreifanleg verkefni. Meðal þeirra verkefna sem stutt hafa verið er Minningarsjóður Lofts Gunnarssonar, Konukot, Reykjadalur, Einstök börn og Pieta svo einhver séu nefnd.

„Við erum ótrúlega þakklát fyrir þetta frábæra framtak Domino's og að hafa valið okkur í ár og Hrefnu fyrir að útbúa þessa dásamlega góðgerðarpizzu. Styrkurinn mun nýtast í að útbúa nýtt fræðslu- og upplýsingaefni fyrir aðstandendur hjartbarna og hjartabörnin sjálf. Hjartans þakkir til allra viðskiptavina Domino's fyrir að kaupa góðgerðarpizzuna í ár og hjálpa okkur þar með að stuðla að betri þjónustu fyrir hjartveik börn og þeirra fjölskyldur.“ segir Fríða Björk Arnardóttir, framkvæmdastjóri Neistans.

Ferðast tveggja daga gömul utan í hjartaaðgerð