Mikill óróleiki hefur gripið um sig á heimsvísu eftir fall tveggja millistórra bandarískra banka í kringum síðustu helgi, annars vegar Silicon Valley Bank og hins vegar Signature Bank. Credit Suisse, annar stærsti banki Sviss, átti í vandræðum fyrir en gærdagurinn var sérstaklega svartur.
Þjóðarbanki Sáda, stærsti einstaki hluthafinn í Credit Suisse, lýsti því yfir opinberlega að hann ætlaði sér ekki að leggja meira fé í bankann. Gengi bréfa í Credit Suisse hrundu í kjölfarið og dróg aðra evrópska banka niður með sér í leiðinni. Viðskipti með bréfin voru stöðvuð sjálfkrafa í svissnesku kauphöllinni.
Nú segja forráðamenn bankans að þeir ætli sér að nýta sér heimild til þess að fá allt að fimmtíu milljarða franka lánaða frá svissneska seðlabankanum.
„Þetta viðbótar lausafé styrkti kjarnastarfsemi Credit Suisse og viðskiptavini á meðan bankinn stígur nauðsynleg skref til þess að búa til einfaldari og hnitmiðaðri banka sem er sniðinn að þörfum viðskiptavina,“ sagði í yfirlýsingu frá svissneska bankanum.
Seðlabanki Sviss segir að féð sé til staðar ef Credit Suisse þarf á því að halda. Bankinn sé tilbúinn að stíga inn í og leggja honum enn frekara lið ef þörf er á, að því er kemur fram í frétt breska ríkisútvarpsins BBC.
