Musk biður Harald afsökunar

Haraldur skrifaði fyrst tíst þar sem hann sagðist ekki hafa fengið nein svör hjá Twitter um það hvort hann ynni enn hjá fyrirtækinu. Því fór hann á Twitter og spurði Musk sjálfan.

Musk svaraði færslunni og fór svo í kjölfarið að gera grín að Haraldi. Þá sakaði hann Harald einnig um að hafa ekki unnið almennilega og að hann hafi notað fötlun sína sem afsökun fyrir því.

Haraldur svaraði um hæl og hófust deilurnar.

Sjá einnig: Haraldur svarar á­sökunum Musk fullum hálsi

Almannatengillinn Andrés Jónsson, sem er æskuvinur Haralds, sagði svo í dag að þó svo að fólk geti upplifað þetta sem hörð átök fyrrum starfsmanns og vinnuveitenda fyrir allra augum þá sé meira á bakvið þetta. Í rauninni hafi Musk gengið í gildru með því að svara færslunni.

Sjá einnig: Elon Musk hafi stigið í taktíska gildru Haraldar

Seinna í kvöld eyddi Musk svo tísti þar sem hann kallaði Harald „þann versta“.

Sjá einnig: Musk eyddi tísti um að Haraldur væri „sá versti“

Það var svo skömmu fyrir ellefu sem Musk svaraði manni á Twitter sem sagðist hafa unnið með Haraldi og að sá síðarnefndi hefði frábært vinnusiðferði, væri hæfileikaríkur og hógvær. Þessi maður, sem heitir Daniel Houghton, sagðist sannfærður um að einhver misskilningur væri þarna á ferðinni.

Í svari Musks sagðist hann hafa haft samband við Harald til að fá hans hlið á málinu.

„Þetta er löng saga,“ sagði Musk og bætti við: „Betra að tala við fólk en að tjá sig með tístum.“

Skömmu fyrir miðnætti bætti hann svo við afsökunarbeiðni til Haralds og sagðist hafa misskilið stöðuna, á grundvelli þess sem aðrir hefðu sagt honum.

Musk sagði að Haraldur væri að íhuga að vinna áfram hjá Twitter.