Rukka fyrir áskrift á Facebook og Instagram

Áskrifendur munu einnig geta staðfest hverjir þeir eru og þannig auka öryggi gegn því að aðrir þykist vera þeir. Þjónustan mun kosta 11,99 dali á mánuði fyrir Facebook og Instagram, sé Facebook notað í vafra í tölvum. Sé Facebook notað í Android eða iOS stýrikerfi Apple kostar þjónustan 14,99 dali.

Byrjað verður að bjóða upp á þessa áskriftarþjónustu í Nýja Sjálandi og Ástralíu í þessari viku. Þá stendur til að gera það í öðrum ríkjum á komandi mánuðum.

Tekjur Facebook eru að lang mestu komnar til vegna auglýsingasölu, þar sem fyrirtæki borga fyrir hnitmiðaðar auglýsingar sem notendur Facebook sjá.

Sjá einnig: Segir upp ellefu þúsund manns

Í grein Financial Times segir að breytingar á persónuverndarreglum Apple frá árinu 2021 hefi komið verulega niður á tekjum Meta, móðurfélags Facebook og Instagram. Breytingarnar meina fyrirtækinu að vakta netnotkun notenda, sem er mikilvægur liður í auglýsingaiðnaði Facebook.

Sjá einnig: Zuckerberg líka ósáttur við Apple

Virði hlutabréfa félagsins hafa aukist verulega í þessum mánuði eftir að opinberað var að auglýsingasala fór fram úr væntingum og að Meta hefur verið að kaupa eigin hlutabréf í miklu magni.

Meta gæti hagnast verulega á áskriftarsölu en forsvarsmenn fyrirtækisins tilkynntu nýverið að um tveir milljarðar manna notuðu Facebook daglega og nærri því þrír milljarðar notuðu einhverjar af vörum Meta, eins og Instagram, WhatsApp og Messenger.

Sjá einnig: Fjórðungur jarðarbúa daglega á Facebook

Sérfræðingur sem FT ræddi við segir þessar breytingar enn eina vísbendinguna um það að þeir dagar þar sem notendur samfélagsmiðla borga fyrir notkunina með persónuupplýsingum sínum séu að enda komnir.

Forsvarsmenn annarra samfélagsmiðla hafa gripið til sambærilegra aðgerða að undanförnu og má þar meðal annars nefna Twitter, Snapchat og Telegram.