Hætta á að skriðuspýjur fari á vegi

Gular viðvaranir eru víða í gildi vegna hvassviðris og mikil rigning hefur verið á sunnan- og vestanverðu landinu síðan í gærkvöld.

Sjá má myndir ljósmyndarans RAX sem teknar voru á Snæfellsnesi í morgun í spilaranum að neðan. 

Veðurstofan hefur varað við aukinni hættu á krapaflóðum sem Esther Hlíðar Jensen, skriðusérfræðingur hjá Veðurstofunni, segir þó ekki virðast miklar líkur á.

„Það hefur mjög mikið tekið upp af snjó þar sem búið að rigna alveg frá miðnætti þannig að það eru minni líkur á krapaflóðum núna, en það er þó enn möguleiki að það komi einhver krapi,“ segir Esther.

„Síðan er möguleiki að þar sem jörðin hefur þiðnað komi einhverjar skriðuspýjur eða grjóthrun.“

Það gæti þá helst verið á sunnanverðum Vestfjörðum eða Vesturlandi en einnig á Suðurlandi og Suðausturlandi, þar sem mesta úrkoman hefur verið.

Er talin einhver hætta á þessu í byggð? 

„Nei, engin hætta í byggð og í rauninni er þetta meira vatnsveður og það geta alltaf fylgt því einhverjar hreyfingar og þá aðallega á vegum.“

Hún bendir fólki á að fylgjast með færð á vegum hjá Vegagerðinni en segir að draga eigi úr hættunni síðar í dag.

„Það á að draga úr úrkominni seinnipartinn og síðan á að fara kólna og þá teljum við á að það séu miklu minni líkur á að eitthvað gerist,“ segir Esther Hlíðar Jensen, skriðusérfræðingur hjá Veðurstofunni.