Sendi Arnaldi handritið reglulega

„Ég sá strax að hér var um að ræða bók sem í senn var mjög spennandi grunnur fyrir bíómynd ásamt því að vera kvikmyndategund sem við höfum ekki séð áður gerða í íslenskum raunveruleika. Reyndar hafði ég strax þá samband við útgefanda en þá var kvikmyndarétturinn frátekinn,“ segir Óskar. Hann tók að sér að leikstýra myndinni og hans fyrsta verk var að setjast niður með Arnaldi Indriðasyni, höfundi bókarinnar.

„Ég byrjaði á að kynna honum sýn mína og fá blessun hans fyrir því hvernig ég sá fyrir mér myndina.

Eftir það sendi ég honum reglulega handritið á meðan við vorum að koma því í tökuhæft form og þáði hjá honum góð ráð. Sama var uppi á teningnum þegar myndin var klippt, hans sjónarhorn á verkefnið með sína djúpu þekkingu á sögunni - en samt verandi alveg fyrir utan allt framleiðsluferlið - var gríðarlega mikilvægur brunnur fyrir mig að geta sótt í.“

Söguþráður myndarinnar hverfist um háleynileg skjöl frá seinni heimstyrjöld sem ákveðin öfl vilja alls ekki að gerð verði opinber. Þegar flugvél nasista sem hvarf í apríl 1945 með skjölin innanborðs, finnst óvænt á Vatnajökli í nútímanum fer af stað æsileg atburðarrás. Myndin gerist að stórum hluta uppi á jöklinum og í nágrenni hans.

Eru einhver atriði í uppáhaldi hjá leikstjóranum?

„Þetta er erfið spurning. Ætli það sé ekki kaflinn svona upp úr miðbiki myndarinnar þegar leikurinn færist alfarið úr þéttbýlinu og í átt að Vatnajökli. Þegar Carr (Iain Glen) heimsækir Einar bónda (Ólafur Darri) og á sama tíma fer Steve (Jack Fox) með Kristínu (Vivian Ólafs) til föður Kristínar, Jóhannesar (Þröstur Leó). Hérna er spennan tekin að magnast og á sama tíma smám saman að koma í ljós um hvað þetta vafstur á jöklinum snýst,“ útskýrir Óskar.

Tökur fóru fram meðan covid faraldurinn gekk yfir sem setti mark sitt á vinnuna en allt gekk þó nokkuð snurðulaust fyrir sig. Óskar varð reyndar sjálfur veikur meðan á tökum stóð en var sem betur fer nánast einkennalaus. „Ég var geymdur úti í trailer í einangrun og talaði bara við leikara og crew gegnum facetime,“ rifjar Óskar upp. Hann segir áhorfendur mega búa sig undir bæði spennu og stuð.

„Þetta er hressandi, spennandi og á köflum pínu fyndin hasarmynd sem tekur sig bærilega hátíðlega og hefur það eina markmið að vera góð skemmtun fyrir alla fjölskylduna (fyrir 12 ára og eldri).