Kepp­endur Söngva­­keppninnar trylla leik­­skóla landsins

Það eru systkinin Valgeir Skorri, Hrafnkell Hugi og Katla Vigdís Vernharðsbörn sem skipa hljómsveitina Celebs. Systkinin koma frá Suðureyri og eiga það sameiginlegt að hafa öll unnið keppnina Músíktilraunir. Þeir Valgeir og Hrafnkell unnu keppnina árið 2015 sem hljómsveitinni Rythmatik. Katla fetaði svo í fótspor þeirra árið 2017 þegar hún vann keppnina með hljómsveitinni Between Mountains.

Árið 2019 ákváðu systkinin svo að sameina krafta sína og stofna hljómsveitina Celebs.

Vatt fljótt upp á sig

Sigurinn í Músiktilraunum er þó ekki það eina sem systkinin eiga sameiginlegt, því þau eru öll að vinna á leikskólum. Þá starfar móðir þeirra einnig sem leikskólastjóri. Það lá því beinast við að hljómsveitin færi á leikskólatúr með lagið sitt Dómsdagsdans.

„Okkur fannst þetta bara alveg tilvalið. Við kunnum á krakkana og vitum alveg hvað er skemmtilegt að gera. Við fórum fyrst bara í það að bóka okkur í leikskólana okkar og hitta krakkana sem við þekkjum en síðan bara vatt það mjög fljótt upp á sig,“ segir Katla Vigdís í samtali við Vísi.

Á síðustu dögum hafa systkinin spilað á tíu leikskólum á höfuðborgarsvæðinu og hefur þeim verið tekið mjög vel, bæði af börnunum en ekki síður leikskólakennurunum.

Bílabúningurinn orðinn vel sveittur eftir öll giggin

„Við keyrðum svo vestur í gær eftir að hafa spilað á fjórum leikskólum fyrir sunnan fyrr um daginn. Þannig að við erum orðin svolítið soðin en þetta er bara svo ofboðslega gaman, þannig við getum ekki hætt. Við erum að koma fram í átta leikskólum bara í dag, “ segir Katla sem segir sveitina þá hafa spilað átján gigg á fjórum dögum eftir daginn í dag.

Systkinin reyna að höfða til barnanna með hinum ýmsu leiðum, meðal annars með prumpubröndrunum og skrautlegum klæðaburði. Sem dæmi um það keypti Hrafnkell, einn meðlimur hljómsveitarinnar, sér sérstakan bílabrautabúning sem hefur vakið mikla lukku meðal barnanna.

„Hann segir að þetta sé í eina skipti sem svona „targeted“ Instagram auglýsing hafi bara virkað 100% þegar hann sá þennan galla auglýstan. Þannig hann er orðinn alveg vel sveittur eftir allar heimsóknirnar. Hann þarf kannski að fara setja hann í hreinsun eftir öll danssporin,“ segir Katla.

„Við þurfum ekki að vera með stöðugt samviskubit“

Celebs stíga á stokk á fyrra undanúrslitakvöldi Söngvakeppninnar þann 18. febrúar þar sem þau munu flytja lagið Dómsdagsdans.

„Þetta er náttúrlega svolítið rosalegur titill á einhverju lagi, Dómsdagsdans. En pælingin er sú að fólk verður fyrir svo rosalega miklu áreiti, sérstaklega ungt fólk. Það eru alls konar áhyggjur sem unga kynslóðin er með, það er ekki hægt að kaupa íbúð og heimurinn er að farast. Stundum er eins og allt sé að fara til fjandans.“

„Þetta lag á að vera smá svona áminning um það að við megum alveg setja þetta allt saman til hliðar eitt kvöld og dansa og hafa gaman. Við þurfum ekki að vera með stöðugt samviskubit. Jafnvel þó svo að það sé eitthvað slæmt í gangi, þá megum taka augnablik og skemmta okkur. Það má,“

segir Katla að lokum, rétt áður en hún er kölluð á svið á leikskóla á Ísafirði.