Katla Björg, Gauti og Jón Erik fyrir Íslands hönd á HM

Íslensku keppendurnir eru þrír að þessu sinni. Þetta eru þau Katla Björg Dagbjartsdóttir, Gauti Guðmundsson og Jón Erik Sigurðsson.

Öll þrjú munu þau keppa í bæði svigi og stórsvigi en fyrsti keppnisdagur Íslendinganna er 16. febrúar.

Katla Björg og Gauti voru bæði meðal keppenda á síðasta heimsmeistaramóti, á Ítalíu fyrir tveimur árum. Katla Björg keppti þar í svigi og stórsvigi og náði fínum árangri í stórsviginu þar sem hún endaði í 34. sæti. Hún féll hins vegar úr keppni í fyrri ferð í sviginu. Gauti keppti í undankeppni í sviginu en rétt missti af sæti í aðalkeppninni.

Hvorugur fulltrúa Íslands í alpagreinum á Vetrarólympíuleikunum í Peking í fyrra er með á HM að þessu sinni. Sturla Snær Snorrason tilkynnti í september síðastliðnum að skíðin væru komin á hilluna og Hólmfríður Dóra Friðgeirsdóttir er sömuleiðis ekki með á HM en hún hefur verið að glíma við meiðsli í vetur.