Lagningu Vest­manna­eyja­strengs flýtt frá 2027 til 2025

Frá þessu er greint í tilkynningu frá Landsneti.

Þar segir einnig að undirbúningur fyrir viðgerð Vestmannaeyjalínu, sem bilaði fyrr í mánuðinum, sé í fullum gangi.

„Framkvæmd hefur verið greining á samfélagslegum kostnaði við það að hafa eingöngu einn sæstreng til Vestmannaeyja sem annað getur bæði forgangs- og skerðanlegri orkuþörf í Eyjum. Greiningin, sem unnin var af verkfræðistofunni Eflu í árslok 2022, sýndi að samkvæmt áhættumati er væntur samfélagslegur kostnaður við að hafa ekki varatengingu sem annað getur allri orkuþörf í Vestmannaeyjum nálægt 100 milljónum árlega,“ segir í tilkynningunni.

Þá segir að ákvörðunin um að flýta lagningu Vestmannaeyjastrengs komi sér vel við að ná fram samlegðaráhrifum í framkvæmdum Landsnets en lagning sæstrengjar yfir Arnarfjörð sé einnig á framkvæmdaáætlun.

„Með því að leggja báða þessa sæstrengi á sama tíma má spara kostnað við strenglagningarskip sem þarf að fá til landsins í verkið og getur sparnaðurinn hlaupið á hundruðum milljóna.“