Óleikfær í fyrsta sinn síðan 2016

Þetta var í fyrsta sinn síðan í apríl 2016 sem Williams er ekki í leikmannahópi Athletic Bilbao í spænsku úrvalsdeildinni en þessi 28 ára gamli sóknarmaður hafði leikið 251 deildarleik í röð fyrir félagið þegar kom að leiknum í kvöld.

Hann glímir við smávægileg hnémeiðsli og var því ekki í leikmannahópnum en hann var fyrir löngu búinn að eigna sér met yfir það að spila flesta leiki í röð, nánar tiltekið þegar hann spilaði sinn 203. leik í röð á síðustu leiktíð.

Williams, sem er fæddur á Spáni en leikur fyrir landslið Gana, hefur spilað alls 362 leiki fyrir Bilbao og skorað 78 mörk.

Leiknum lauk með 1-0 sigri Celta Vigo.