Everything Everywhere All at Once með flestar tilnefningar

Elma Rut Valtýsdóttir skrifar 24. janúar 2023 16:20

Myndin Everything Everywhere All at Once er sú mynd sem hlýtur flestar tilnefningar til Óskarsverðlaunanna. Getty/Leon Bennett

Tilnefningar til Óskarsverðlaunanna árið 2023 voru tilkynntar í dag. Ár hvert ríkir mikil spenna fyrir tilnefningunum og var árið í ár engin undantekning.

Það voru leikararnir Riz Ahmed og Allison Williams sem kynntu tilnefningarnar í beinni útsendingu á YouTube síðu Óskarsverðlaunanna. Vísir var að sjálfsögðu með puttann á púlsinum og var hægt að fylgjast með tilnefningunum í beinni útsendingu á Stöð 2 Vísi og hér á Vísi. Hér má finna beina textalýsingu frá útsendingunni fyrr í dag.

Everything Everywhere All at Once hlaut ellefu tilnefningar

Tilnefnt var í tuttugu og þremur flokkum. Sú kvikmynd sem hlaut flestar tilnefningar er kvikmyndin Everything Everywhere All at Once sem hlaut alls ellefu tilnefningar, þar á meðal sem besta myndin. Aðalleikkona myndarinnar Michelle Yeoh er tilnefnd sem besta leikkona í aðalhlutverki. Þá eru leikkonurnar Jamie Lee Curtis og Stephanie Hsu tilnefndar sem bestu leikkonur í aukahlutverki fyrir hlutverk sín í myndinni. Ke Huy Quan sem einnig fer með hlutverk í myndinni er tilnefndur sem besti leikari í aukahlutverki. Þá er myndin einnig tilnefnd fyrir leikstjórn, búninga, klippingu, handrit, tónlist og besta frumsamda lagið.

Leikkonurnar Michelle Yeoh og Jamie Lee Curtis eru á meðal þeirra sem tilnefnd eru fyrir hlutverk sín í myndinni Everything Everywhere All at Once.Getty/Amy Sussman-Frazer Harrison

Tilnefnd fyrir túlkun sína á goðsögnunum Presley og Monroe

Myndirnar All The Quiet on The Western Front og The Banshees of Inisherin hlutu báðar níu tilnefningar, þar á meðal sem bestu myndirnar.

Það kom líklega fáum á óvart að Austin Butler hafi verið tilnefndur fyrir túlkun sína á kónginum sjálfum, Elvis Presley. Myndinni Elvis var spáð góðu gengi á hátíðinni en hún var alls tilnefnd í átta flokkum, þar á meðal sem besta myndin.

Í flokknum besti leikari í aðalhlutverki keppir Butler við leikarana Collin Farrel, Brendan Fraser, Paul Mescal og Bill Nighy.

Það vekur athygli að Ana de Armas sé tilnefnd sem besta leikkona í aðalhlutverki. Hún fær tilnefninguna fyrir túlkun sína á goðsögninni Marilyn Monroe í myndinni Blonde. Myndin fékk misjafna dóma og er til að mynda aðeins með 5,5 í einkunn á kvikmyndavefnum IMDB.

Í flokknum besta leikkona í aðalhlutverki keppir Armas við leikkonurnar Cate Blanchett, Andreu Riseborough, Michelle Williams og Michelle Yeoh.

Austin Butler er tilnefndur fyrir hlutverk sitt sem Elvis Presley og Ana de Armas er tilnefnd fyrir hlutverk sitt sem Marilyn Monroe.IMDB

Íslendingar eiga nýjan fulltrúa á Óskarnum

Hildur Guðnadóttir var ekki tilnefnd að þessu sinni en Íslendingar munu þó eiga annan fulltrúa á hátíðinni þetta árið. Íslenski leikstjórinn Sara Gunnarsdóttir var tilnefnd fyrir stuttu teiknimyndina My Year Of Dicks.

Í samtali við fréttastofu sagði Sara tilnefninguna ekki hafa komið sérstaklega á óvart en hún hafi þó verið afar stressuð.

Óskarsverðlaunahátíðin fer fram þann 12. mars næstkomandi og verður það í 95. skipti sem hátíðin er haldin. Hátíðin verður í beinni útsendingu á Stöð 2 og fyrir afhendinguna verður hægt að fylgjast með stjörnunum mæta á rauða dregilinn á Stöð 2 Vísi.

Hér að neðan má sjá lista yfir allar tilnefningarnar.