Inter í átta liða úrslit eftir dramatíska endurkomu

Parma, sem situr í sjötta sæti ítölsku B-deildarinnar, tók forystuna í leiknum þegar Stanko Juric kom boltanum í netið tæpum tíu mínútum fyrir lok fyrri hálfleiks og staðan var því 0-1 þegar liðin gengu til búningsherbergja.

Lengst af leit út fyrir að mark Juric myndi duga gestunum til að tryggja sér sæti í átta liða úrslitum, en Lautaro Martinez kom Inter í framlengingu með marki á 88. mínútu.

Þar reyndust heimamenn sterkari og Francesco Acerbi skoraði sigurmark liðsins snemma í síðari hálfleik framlengingarinnar og Inter því á leið í átta liða úrslit á kostnað Parma sem situr eftir með sárt ennið.