„Angel gæti kennt þér að gráta, koma vel fram við konur og skora í úrslitaleikjum“

Rami blandaði sér í umræðuna um látalæti Emilianos Martínez, markvarðar Argentínu, eftir úrslitaleik HM þar sem argentínska liðið vann það franska í vítaspyrnukeppni. Rami, sem varð heimsmeistari með Frökkum 2018, kallaði Martínez „mesta skíthælinn í fótboltanum.“

Di María, sem skoraði í úrslitaleiknum í síðustu viku, sagði Rami í kjölfarið að fara að grenja úti í horni. Rami var ekki fyrr búinn að jafna sig á þessu höggi þegar hann fékk annað, og talsvert þyngra, högg frá eiginkonu Di Marías, Jorgelinu Cardoso.

„Angel gæti kennt þér að gráta, koma vel fram við konur og skora í úrslitaleikjum. Gleðilegt nýtt ár, snillingur,“ skrifaði Cardoso á Instagram. Í færslunni vísaði hún til sambands Ramis við Pamelu Anderson en Rami hélt framhjá strandverðinum fyrrverandi þegar þau voru í sambandi og kom afar illa fram við hana.

Martínez er einn umtalaðasti og óvinsælasti leikmaður heims um þessar mundir. Eftir úrslitaleik HM söng Martínez níðsöngva um Kylian Mbappé og mætti með brúðu með andliti hans þegar Argentínumenn fögnuðu heimsmeistaratitlinum í opinni rútu í Búenos Aires. 

Mbappé, sem skoraði þrennu í úrslitaleiknum, tjáði sig í fyrsta skipti um stælana í Martínez eftir leik Paris Saint-Germain og Strasbourg í frönsku úrvalsdeildinni í gær.

„Fagnaðarlæti eru ekki vandamál fyrir mér. Ég eyði ekki orku í svo léttvæga hluti. Það sem er mikilvægt fyrir mér er að gefa mitt besta fyrir félagið,“ sagði Mbappé sem skoraði sigurmark PSG þegar sex mínútur voru komnar fram yfir venjulegan leiktíma.

Di María gekk í raðir Juventus í sumar eftir átta ár hjá PSG. Þar mætti hann Rami nokkrum sinnum. Sá franski leikur núna með Troyes. Hann lék 36 landsleiki á sínum tíma.