Ísmaðurinn örugglega áfram en Sá einstaki lenti í basli

Gerwin Price lenti í örlitlum byrjunarörðuleikum gegn Luke Woodhouse í seinustu viðureign kvöldsins, en Woodhouse situr í 50. sæti heimslistans. Woodhouse, sem hafði betur gegn Úkraínumanninum Vladyslav Omelchenko, vann fyrsta settið gegn Price í kvöld, 1-3.

Gerwyn Price lét það þó ekki á sig fá og sýndi þó fljótt af hverju hann er efsti maður heimslistans. Hann vann að lokum öruggan 3-1 sigur og tryggði sér sæti í 32-manna úrslitum heimsmeistaramótsins.

Þá þurfti Portúgalinn José de Sousa svo sannarlega að hafa fyrir hlutunum er hann mætti Ástralanum Simon Whitlock fyrr í kvöld.

Whitlock vann fyrstu tvö settin og setti þar með pressu á De Sousa, en Sá sérstaki, eins og De Sousa er kallaður, snéri taflinu þó sér í vil og vann að lokum 3-2 sigur.