Segir félagið nauðbeygt til að hækka leiguverð

Greint var frá því í kvöldfréttum Stöðvar 2 í gærkvöldi að þrátt fyrir að Íbúðafélagið Alma hafi skilað 12,4 milljarða methagnaði á síðasta ári þá muni félagið hækka leigu hjá sínu fólki um fjórðung eftir áramót.

Rætt var við Brynju Bjarnadóttur sem er öryrki og hefur búið í leiguíbúð í eigu félagsins síðustu ár. Hún hefur greitt um 250 þúsund krónur í leigu á mánuði en fékk tilkynningu um mánaðamótin um að frá og með fyrsta febrúar hækki leigan í 325 þúsund krónur. Brynja segist vera á götunni eftir að félagið hækkaði við hana leiguna en henni eru gefnir tveir mánuðir til að endurnýja eða flytja ella.

Vísir greindi frá því fyrr í dag að fréttastofa hafi gert ítrekaðar tilraunir til að ná tali af Ingólfi Árna Gunnarssyni, framkvæmdastjóra Ölmu, undanfarinn sólarhring vegna málsins. Hann svaraði hvorki símtölum né skilaboðum fréttastofu í gær. Ingólfur Árni er sonur Gunnars Þórs, eins systkinanna fjögurra sem eiga Langasjó.

Segjast harma stöðuna sem upp er komin

Í fréttatilkynningu sem Ingólfur Árni Gunnarson, framkvæmdastjóri Ölmu sendi frá sér fyrr í kvöld kemur fram að Alma íbúðafélag muni ekki tjá sig um mál einstakra viðskiptavina en félagið harmi þá stöðu sem komin er upp hjá einum þeirra og fjallað hefur verið um í fréttum síðustu daga.

„Alma hefur á undanförnum árum reynt að koma til móts við þarfir viðskiptavina sinna meðal annars með því að fresta fyrirhuguðum verðhækkunum og bjóða upp á dreifingu á leigu þegar kórónuveirufaraldurinn gekk yfir. Um mitt ár, þegar aukin óvissa var í efnahagslífinu, bauð félagið áframhaldandi leigusamninga á óbreyttum kjörum sem flestir viðskiptavina þáðu.“

Þá kemur fram að almennt reyni Alma að sýna viðskiptavinum sínum sveigjanleika ef aðstæður breytast, þó það takist ekki alltaf.

„Í ljósi núverandi efnahagsástands er Alma nauðbeygð til að hækka leiguverð á þeim samningum sem eru að renna út. Alma mun eftir fremsta megni reyna að halda þeim hækkunum í lágmarki. Þess ber þó að halda til haga að sú hækkun sem fjölmiðlar hafa fjallað um endurspeglar ekki almennt þær verðhækkanir sem Alma hefur þurft að ráðast í. Leiguverð íbúða og hækkanir miðast við stærð, staðsetningu og ástand, óháð því hver leigir þær.“

Í tilkynningunni segir að Alma „starfi á almennum leigumarkaði, þjónusti ákveðinn hóp leigjenda og sé einungis með um 4 prósent af leigumarkaðinum með um eitt þúsund manns í viðskiptum.“ 

Þá kemur fram að hagnaður Ölmu íbúðafélags árið 2021, sem fjölmiðlar hafa tengt við stöðu á leigumarkaði, sé að mestu leyti tilkominn vegna matsbreytinga á eignum og hækkun verðbréfa í skráðu félögunum Reitum, Regin og Eik, sem Alma á hlut í auk annars reksturs.