Pílupartýið í kvöld: Eina markmið Martins að enda fyrir ofan Tomma Steindórs

Úrslitakvöldið í Úrvalsdeildinni í pílukasti er í kvöld og verður í beinni útsendingu á Stöð 2 Sport. Að úrslitakvöldinu loknu verður Stjörnupílan haldin í fyrsta skipti þar sem frægir Íslendingar spila með bestu pílukösturum landsins. 

Af þessu tilefni ætlum við að skoða betur liðin sem taka þátt, sem og þá fjóra keppendur sem freista þess að vinna Úrvalsdeildina í kvöld.

Reglur í Stjörnupílunni verða nánast hefbundnar þar sem spilaður verður 501 tvímenningur. Reglubreytingar verða þannig að fagmennirnir þurfa að hitta í tvöfaldan reit í lokin til að vinna legg en þjóðþekktu áhugamennirnir mega hitta í þann reit sem hentar til að klára legginn, sem gefur þeim því smá forgjöf.

Síðustu daga höfum við fengið að kynnast átta liðum og nú er komið að því að skoða tvo þeirra fjögurra keppenda sem keppa á úrslitakvöldi Úrvalsdeildarinnar.

Spenningur fyrir Stjörnupílunni er mikill og hefur heyrst úr herbúðum liðanna að þau hafi nýtt vikuna til að hittast og æfa saman. Tómas Steindórsson hefur farið mikinn í ruslatalinu og markmið hans er að komast sem mest í hausinn á andstæðingum sínum. Tommi hringdi í Hjálmar Örn Jóhannsson í dag, betur þekktan sem Hjamma, til þess að prufukeyra þessa aðferð sína en það kemur í ljós í kvöld hvort aðferðin hafi virkað. 

Hægt er að hlusta á símtalið í spilaranum hérna fyrir neðan.

Martin Hermannsson mætti í viðtal til Vals Páls Eiríkssonar íþróttafréttamanns í vikunni og spurði Valur hann meðal annars út í Stjörnupíluna. 

„Ég hef spilað marga mjög stóra leiki, spilað fyrir framan fyrir þúsundir manna en þessi píla er að stressa mig verulega upp,“ sagði Martin sem segist ekkert vita hvað hann sé að fara að gera.

„Ég ætla ekki að æfa mig, ég ætla að hugsa um þetta eins og vítaskotin. Ég æfi ekki vítaskotin. Ég er alltaf bestur undir pressu og ég ætla allavega að vinna Tomma Steindórs, það er eina sem ég veit. Ég ætla ekki að leyfa Tomma að vinna mig og hafa eitthvað á mig.“

Vitor dreymir um að mæta Michael van Gerwen

Hinn skeggprúði Vitor Charrua, sem kallaður er „Handsprengjan“ (e. The Grenade) verður einn af þeim keppendum sem keppa til úrslita í Úrvalsdeildinni í kvöld. 

Vitor er 45 ára smiður og byrjaði í pílu fyrir átta árum. Hann keppir undir merkjum Pílukastfélags Hafnarfjarðar sem hann átti stóran þátt í að stofna fyrir ekki svo löngu síðan. Vitor á nokkra Íslandsmeistaratitla í pílu og er afar stoltur af bronsverðlaunum sem hann vann á Nordic Cup Open fyrr á þessu ári. 

Handsprengjan ætlar sér að fara alla leið á úrslitakvöldinu og verður að teljast líklegur kandídat.

Við báðum Vitor um að svara fyrir okkur örfáum spurningum.

Karl Helgi er 57 ára kokkur hjá Grillvagninum og hefur stundað pílu í þónokkur ár. Kalli, eins og hann er kallaður, spilar fyrir Pílufélag Reykjavíkur. Kalli var í riðli með Guðjóni Hauksyni og endaði þar í öðru sæti en þar sem Guðjón forfallaðist á úrslitakvöldið þá stökk Kalli strax á tækifærið að mæta. 

Kalli hefur ekki orðið Íslandsmeistari á sínum ferli en hefur hinsvegar orðið Reykjavíkurmeistari þar sem hann tók út „The big fish“ í undanúrslitum, eða hæsta mögulega útskot pílukasti sem er 170 stig. Í úrslitaeinvíginu tók hann út 158 sem einnig er mjög hátt útskot. Kalli getur oftast galdrað eitthvað skemmtileg fram og bíðum við spennt að sjá hvað það verður í kvöld.

Kalli svaraði einnig nokkrum spurningum fyrir okkur.

Við viljum endilega minna á það gætu verið laus spjöld inní bláa keppnissalnum á Bullseye og hægt að bóka þau spjöld inná www.bullseye.is. Annars er öllum velkomið að koma á svæðið á meðan pláss leyfir í kvöld og horfa á þessa veislu sem framundan er.