Fjárfestar sýna Liverpool mikinn áhuga

Greint var frá áformum FSG á dögunum og fullyrti fjölmiðlillinn The Athletic að söluferlið væri hafið. Liverpool hefur verið í eigu FSG, undir forystu John Henry, frá október 2010 þegar fjárfestingafélagið keypti enska félagið frá George N. Gillett og Tom Hicks.

FSG nýtur aðstoðar bankanna Goldman Sachs og Morgan Stanley í söluferlinu og í viðtali við Boston Globe segir Sam Kennedy, einn af eigendum FSG, að áhugi fjárfesta sé mikill. Talið er að FSG skoði helst að fá að borðinu fjárfesta sem kaupa myndu lítinn hlut í Liverpool en sé einnig tilbúið að skoða yfirtöku á öllum hlut fjárfestingafélagsins.

„Það hefur verið mikill áhugi frá fjölmörgum aðilum sem tilbúnir eru að fjárfesta í félaginu. Við erum snemma í því ferli að skoða þessa möguleika,“ sagði Kennedy en þetta er það fyrsta sem heyrist opinberlega frá FSG síðan yfirlýsing um mögulega sölu Liverpool var gefin út í byrjun mánaðarins.

FSG keypti Liverpool fyrir 300 milljónir punda í október árið 2010 og hefur verið í samstarfi við bankana tvo til að áætla núverandi virði félagsins. Orðrómar hafa verið á kreiki um að verðmæti Liverpool gæti numið allt að 4,4 milljörðum punda.

Til samanburðar seldi Roman Abramovich hlut sinn í Chelsea fyrir 4,25 milljarða punda fyrr á þessu ári til félags í eigu Todd Boehly.

Kennedy segir að ein leið til að auka virði félagsins sé að selja hluti eða bæta við fjárfestum.

„Þýðir það að við munum selja Liverpool? Ég veit það ekki. Það er hlutverk John Henry, Tom Werner og Mike Gordon að reka FSG á ábyrgan hátt og þeir mátu það sem svo að þetta væri frábær tími til að skoða möguleikana á því að fá inn nýja fjárfesta.“