Íslensku stelpurnar verða ekki saman eftir leikinn: Tvær rútur í sitthvora átt

Það var búið að vera í nógu að snúast hjá framkvæmdastjóranum síðustu daga sem og nú á morgni leikdags.

„Það er ýmislegt búið að gerast sem er bara skemmtilegt. Það er alltaf verið að biðja um fleiri og fleiri miða sem ég fagna alltaf ákaflega. Smá bras með skipulagið en við leysum þetta allt. Við erum bara að vera tilbúin í skemmtilegan og góðan leik,“ sagði Klara Bjartmarz en hvað er von á mörgum Íslendingum á leikinn?

Vona að það verði 250 Íslendingar

„Ég er að vona að það verði alla vega svona 250. Það eru kannski færri sem koma af næstum bæjum eins og gerðist í Hollandi en það alla vega 170 staðfestir,“ sagði Klara.

Viðtalið var tekið fyrir utan leikvanginn. Einhverjir höfðu áhyggjur af því að grasið á vellinum væri dapurt eftir að hafa séð mynd af því í gær.

„Völlurinn var blautur og þungur í gær en nú skín sólin og það er farið að hitna vel. Ég held að hann verði fljótur að drena sig. Þetta verður allt í lagi og eins fyrir bæði lið. Við tökum því sem að höndum ber,“ sagði Klara.

Þar sem er vilji þar er vegur

Það voru vangaveltur um hvort landsliðsfyrirliðinn Sara Björk Gunnarsdóttir gæti spilað leikinn vegna veikinda.

„Hún var mætt í máltíðirnar áðan og verður vonandi tilbúin í leikinn. Þar sem er vilji þar er vegur og þar sem Sara Björk er sú um ræðir þá hef ég ekki miklar áhyggjur af því,“ sagði Klara.

Íslenska liðið var við æfingar á Algarve og ferðaðist svo norður til Portúgal á sunnudaginn.

„Við náðum hæstum hæðum í að týna töskum og fleiru en það eru allir komnir með sitt að lokum. Þetta bjargast allt og við munum mæta til leiks,“ sagði Klara.

„Við náðum að týna töskum á nánast hverjum einasta legg í ferðalaginu og þegar ég segi við þá er ég að tala um einhverja sem tengjast okkur og eru að vinna fyrir okkur. Þetta komst allt heim að lokum. Það sem hefur ekki náð til okkar eru hlutir sem skipta ekki máli. Það skiptir ekkert annað máli í dag heldur en leikurinn,“ sagði Klara.

Þurfa að spila í gömlu varabúningunum

Búningatöskurnar eru ekki týndar og íslenska liðið spilar því í sínum búningum. Það verða þó ekki nýju búningarnir.

„Við verðum í gömlu hvítu í dag því eitt af því sem kom upp fyrir leikinn að við vorum ekki komin með kvensniðin af nýja varabúningnum frá Puma. Við verðum því í gamla varabúningnum en við þekkjum hann vel því við spiluðu í honum í tveimur leikjum á EM. Við látum ekki slík smáatriði slá okkur út af laginu,“ sagði Klara.

Íslenska liðið fer í tvær áttir strax eftir leikinn í kvöld.

„Við verðum með tvær rútur tilbúnar eftir leikinn. Annar hópurinn fer út á flugvöll og flýgur heim í góðu yfirlæti hjá vinum okkar í Icelandair en hinn hópurinn fer inn á hótel með einum starfsmanni sem tryggir það að þær komist heilar og höldnu heim til sín á morgun,“ sagði Klara.

„Auðvitað hefði verið gaman að vera saman eftir leik en með þessum litla fyrirvara er ekki auðvelt að skipuleggja ferðalög þvers og kurrs um ekki bara Evrópu heldur líka þurfa þær sem búa í Bandaríkjunum líka að komast heim til sín,“ sagði Klara.

Ekki skipulagt áður leik sem svona stuttum fyrirvara

„Við höfum ekki skipulagt leik sem svona stuttum fyrirvara áður og það eru ýmsir gallar sem því fylgja,“ sagði Klara en hún er bjartsýn fyrir leikinn.

„Ég er alltaf bjartsýn. Við höfum góða sögu á móti Portúgal, við erum með topplið, kunnum að verjast og kunnum að sækja. Ef við spilum okkar bolta þá eru okkur allir vegir færir,“ sagði Klara að lokum en það má horfa á allt viðtalið hér fyrir ofan.