Saka hvor aðra um njósnir og innbrot

Kjarninn greindi fyrst frá málinu. Þar kom fram að þær Agnieszka og Ólöf Helga Adolfsdóttir, þá varaformaður Eflingar, hafi óskað eftir aðgangi að tölvupóstssamskiptum Sólveigar Önnu og Viðars Þorsteinssonar, þá fyrrverandi framkvæmdastjóra Eflingar. Eftir að hafa leitað álits Halldórs Oddsonar, lögfræðings ASÍ sem lagði blessun sína á aðgang Agnieszku, höfðu þær aðgang að tölvupósthólfi Sólveigar Önnu frá 12. janúar til 13. apríl 2022. Þær Agnieszku og Sólveigu greinir hins vegar á um lögmæti þess aðgangs. Þær hafa báðar látið vinna lögfræðiálit sínu máli til stuðnings.

Í samtali við fréttastofu segist Sólveig Anna ekki hafa vitað af aðgangi þeirra Agnieszku Ewu og Ólafar Helgu. Það hafi komið henni á óvart þegar að Ólöf Helga hafi vitnað í tölvupóstssamskipti hennar og Drífu Snædal, fyrrverandi formann ASÍ, á stjórnarfundi 22. september síðastliðinn.

„Ég og félagar mínir verðum heldur undrandi og ég fer eiginlega að hlæja og spyr nánar út í það hvernig hún viti af okkar tölvupóstssamskiptum. Ólöf svarar því að hún þurfi ekki að segja frá því. Svo heldur umræðan á fundinum áfram, mér finnst þetta undarlegt en ég hugsa ekkert meira um þetta.“

Fyrir viku segist Sólveig Anna hafa komist yfir prentaða tölvupósta á skrifstofu Agnieszku sem voru frá henni sjálfri á tvo starfsmenn Eflingar.

„Það tekur mig smá tíma að viðurkenna fyrir sjálfri mér hvað hljóti að hafa gerst. Að það sé engin önnur útskýring en sú að Agnieszka Ewa hafi með einhverjum hætti komist í gegnum tölvupósta mína. Þetta var á fimmtudaginn fyrir viku. Degi síðar kemst ég svo að því að þetta hafi hreinlega gerst og að þær hafi tengt tölvupósta okkar Viðars við þeirra aðgang,“ segir Sólveig

Tvískinnungur að ásaka um njósnir en brjótast svo í skúffu

Agnieszka Ewa segir hins vegar að sér hafi brugðið verulega þegar hún varð þess vör, af umfjöllun Kjarnans, að Sólveig Anna og hennar félagar hafi brotist í læsta skúffu á skrifstofu hennar. Hún hafi verið erlendis vegna dauðsfalls í fjölskyldunni.

„Þetta er ákveðin hræsni að hún skuli saka mig um njósnir en viðurkennir svo sjálf að hafa brotist inn á skrifstofuna mína á meðan ég var ekki á landinu, og brotist inn í skúffu, sem ég var ein með lykil að, þar sem mínir persónulegu munir eru,“ segir Agnieszka

Hún segir engan vafa á því að henni hafi verið heimilt að fá aðgang að pósthólfunum, henni hafi raunar borið skylda til þess sem staðgengill Sólveigar, samkvæmt lögum Eflingar.

„Mörg mál hefðu endað ókláruð og dagað uppi í pósthólfi Sólveigar og þess vegna óskaði ég eftir aðgangi að pósthólfunum.“

Hún segist því hafa leitað bæði lögfræðiálits og persónuverndarálits áður aðgangur var veittur.

„Sólveigu var veittur frestur til að veita okkur þau gögn sem okkur eru nauðsynleg til að halda ýmsum verkefnum áfram, sem og frest til að fjarlægja persónuleg gögn, sem hún nýtti sér,“ segir Agnieszka og bætir við að uppsagnarfrestur hennar hjá Eflingu klárist 31. október næstkomandi.

Í aðsendri grein á Vísi, sem birtist í gær, lýsa formenn ellefu verkalýðsfélaga undir hatti Alþýðusambands Íslands áhyggjum af þeim stjórnarháttum Sólveigar Önnu og Ragnars Þórs. Sólveig Anna segir tvo höfunda hafa verið viðstödd fund ASÍ þar sem hún greindi frá meintum njósnum og segir þau greinilega ekkert hafa séð athugavert við háttsemi Agnieszku.

Báðar í hart

Sólveig Anna var endurkjörinn formaður 15. febrúar og tók við formennsku 8. apríl síðastliðinn. Hún telur það líklegast að þær Agnieszka og Ólöf Helga hafi með því að fá aðgang að pósthólfunum ætlað sér að „róta þar og finna einhvern skít.“

„Á þessum tíma hefur Ólöf Helga gefið kost á sér í stjórn. Ég gef kost á mér 25. janúar, þá láta þær sér samt ekki detta til hugar að nú sé komin stór og mikil ástæða til að hætta þessu en á þessu tímabili hafa þessar njósnir sennilega náð hámarki,“ segir Sólveig að lokum.

Nú munu þær báðar, Agnieszka Ewa og Sólveig Anna, leita réttar síns vegna atvikanna.

Sólveig Anna hyggst tilkynna atvikið til Persónuverndar. Hún segist hafa rætt málið á miðstjórnarfundi ASÍ þar sem hún taldi að aðrir formenn hreyfingarinnar þyrftu að vita af atvikinu og framgangi lögmanns ASÍ, Halldórs Oddsonar.

Agnieszka Ewa hefur greint frá því hún muni leita réttar síns vegna þess hvernig Sólveig Anna hafi komist yfir útprentaða tölvupóstana.