Rekstur Strætó virðist í blóma við fyrstu sýn

„Hvað er það fyrsta sem þið hugsið þegar þið sjáið þessar myndir úr ársreikningi Strætó? Er það að skuldir séu á leiðinni niður og eiginfjárhlutfall á leiðinni upp? Kíkið aftur.“

Þetta skrifaði Brynjólfur Gauti Guðrúnar Jónsson, doktorsnemi í tölfræði á Twitter við mikil viðbrögð. Fyrstu viðbrögð margra eru enda að hugsa með sér að hér sé á ferðinni tilraun Strætó til þess að fegra bókhaldið. Láta það líta út fyrir að eigin fé sé á stöðugri uppleið og skuldir á niðurleið, þegar raunin er einmitt hið andstæða. Ársreikninginn má skoða hér að neðan.

• straetobs_arsreikningur_31122021_undirritadPDF733KB
  Sækja skjal

Að eigin sögn er Brynjólfur sérstakur áhugamaður um að uppræta bull, eftir smá umhugsun um hvernig heppilegast væri að snara „að calla bullshit“. Nánar tiltekið bull sem tengist misvísandi framsetningum gagna á ýmsum sviðum þjóðfélagsins. Í því skyni hefur hann meira að segja sett upp vefsíðu að nafni Metill.is þar sem hann gerir ýmsar gagnaupplýsingar aðgengilegri hinum almenna borgara.

Hönnunarbrella?

„Það er almenn regla þegar teiknað er eftir tíma að tíminn byrji vinstra megin og endar til hægri. Þegar þessu er öfugt farið getur það gerst að fólk horfir ekki á merkingar og túlkunin verður öfug við það sem myndin sýnir í raun.“

Hann segir þó ekki víst að þetta sé viljandi gert til að rugla fólk en skrýtið þó.

„ Ég var einmitt vá voðalega gengur þetta vel og svo bara nei, þetta getur reyndar ekki staðist. Ég hef séð Excel-skrár þar sem nýjasta árið er lengst til vinstri og maður getur skilið það. Þá viltu byrja á nýjasta árinu, maður vill frekar hugsa um þetta svona en að það hafi verið einhver vondur ásetningur. En þetta er mjög slæmt myndrit,“ segir Brynjólfur.

Hér sé verið að teikna upp gögn og mæti flokkast sem hönnunarbrella.

„Svo hugsar maður að þau hafi ekki einu sinni búist við því að einhver myndi skoða þessa ársreikninga,“ segir Brynjólfur og hlær.

Eins og áður segir stundar hann nú nám í tölfræði við Háskóla Íslands og vinnur samhliða hjá Hjartavernd sem tölfræðingur. Þá vann hann einnig að spálíkanagerð fyrir Háskólann í Covid-faraldrinum margfræga. Í gegnum tíðina segir Brynjólfur að mörg dæmi hafi skotið upp kollinum þar sem illa er farið með gögn og þeim beitt á misvísandi hátt. Þar nefnir hann frægt dæmi er þar sem fjallað var um dauða af völdum skotvopna í frétt Reuters og Brynjólfur deildi á Twitter-síðu sinni.