Mörkin í Meistaradeildinni: Sjáðu ótrúlegt mark Haalands

Það var nóg um að vera í Meistaradeildinni og má þar nefna óvænt jafntefli Chelsea gegn Salzburg í fyrsta leiknum undir stjórn Grahams Potter, mikið vítadrama í Skotlandi og frumraun hins 19 ára Ísaks Bergmanns Jóhannessonar í sterkustu félagsliðakeppni heims. Þá skoruðu Messi, Neymar og Mbappé allir fyrir PSG í Ísrael.

Stórleikur kvöldsins var í Manchester þar sem heimamenn unnu 2-1 sigur gegn Dortmund.

Jude Bellingham kom Dortmund yfir með frábæru skallamarki og lengi vel virtist það ætla að duga Dortmund. John Stones jafnaði hins vegar metin með þrumuskoti utan teigs, þegar tíu mínútur voru eftir. Þá var enn tími fyrir Erling Haaland til að skora stórbrotið sigurmark eftir fyrirgjöf frá Joao Cancelo en báðar spyrnurnar voru utanfótar. Haaland fagnaði þó ekki markinu, gegn sínu gamla liði.

Chelsea náði aðeins 1-1 jafntefli við austurríska liðið Salzburg, eftir tap gegn Dinamo Zagreb í fyrsta leik. Raheem Sterling kom Chelsea yfir með snotru marki en Salzburg jók á vandræði Chelsea með jöfnunarmarki Noah Okafor korteri fyrir leikslok. Ekki beinlínis úrslitin sem Graham Potter vildi í fyrsta leik sínum sem stjóri Chelsea.

Ísak Bergmann Jóhannesson var í byrjunarliði FCK og Hákon Arnar Haraldsson kom inn á sem varamaður, en engum tókst að skora þegar liðið gerði jafntefli við Sevilla á Parken. Þrjú góð færi litu þó dagsins ljós í fyrri hálfleiknum.

Real Madrid var lengi að skora gegn Leipzig en að lokum unnu meistararnir 2-0 sigur. Federico Valverde og Marco Asensio skoruðu mörk Real en það seinna var afar snoturt.

Juventus tapaði gegn Benfica á heimavelli, 2-1. Arkadiusz Milik kom Juventus yfir með skalla en Benfica jafnaði metin úr vítaspyrnu Joao Mario og komst yfir snemma í seinni hálfleik eftir þunga sókn, með marki David Neres. Bremer fékk dauðafæri til að tryggja Juventus stig í lokin en skaut yfir.

AC Milan vann Dinamo Zagreb 3-1. Olivier Giroud kom AC Milan yfir undir lok fyrri hálfleiks, með marki úr vítaspyrnu, og Alexis Saelemaekers bætti við skallamarki í byrjun seinni hálfleiks. Mislav Orsic gaf Dinamo von en Tommaso Pobega innsiglaði sigur Milan með föstu skoti í slá og inn.

Það var nóg að gerast í leik Rangers og Napoli þar sem gestirnir unnu þó að lokum 3-0 sigur. Napoli fékk víti eftir klukkutíma leik, spyrnu sem þurfti svo að endurtaka, en í bæði skiptin varði Allan McGregor í marki Rangers sem þó missti þá James Sands af velli með rautt spjald.

McGregor náði hins vegar ekki að verja víti skömmu síðar þegar Matteo Politano kom Napoli yfir, og varamennirnir Giacomo Raspadori og Tanguy Ndombélé innsigluðu svo sigur Napoli í lokin.

Shaktar Donetsk og Celtic gerðu svo 1-1 jafntefli í Varsjá í Póllandi. Celtic komst yfir með sjálfsmarki en Mykhailo Mudryk jafnaði metin fyrir Shaktar. Shaktar virtist svo hafa komist yfir en markið var dæmt af vegna naumrar rangstöðu.

Loks vann PSG 3-1 útisigur gegn Maccabi Haifa þar sem þeir Lionel Messi, Neymar og Kylian Mbappé skoruðu allir.