„Þurfum að vinna í kvöld til að halda lífi í einhverri titilbaráttu“

Valur er með 35 stig á toppi deildarinnar þegar toppliðin tvo eiga bæði fjóra leiki eftir, en Breiðablik er með 29 stig í öðru sæti. Vinni Valur leikinn nær liðið níu stiga forskoti og aðeins níu stig í pottinum, Blikar minnka bilið aftur á móti í þrjú stig með sigri.

„Ég held að það sé alveg ljóst að til að halda lífi í einhverri titilbaráttu þá þurfum við að vinna þennan leik í kvöld. Valskonur hafa verið öflugar í sumar, og eins og var kannski spáð var fyrir mót, að þær ættu að rúlla yfir þetta mót og að keppnin væri um annað sætið,“ segir Ásmundur.

„Það eru fjórir leikir eftir og það er ekki alveg dauð titilbaráttan. Okkar verkefni verður að vinna leikinn í kvöld til að halda lífi í þeirri baráttu,“

Breiðablik á enn eftir að vinna Val í ár. Valur vann eftir vítaspyrnukeppni í Meistarakeppni KSÍ í vor, og vann 1-0 sigur þegar liðin mættust á Kópavogsvelli í deildinni í maí. Þá vann Valur 2-1 sigur á Breiðabliki í bikarúrslitum á dögunum. Ásmundur segir þó allt hægt í kvöld.

„Þetta eru fjórði mótsleikurinn í ár. Þetta hafa alltaf verið hörkuleikir og jafnir leikir. Þannig að mínu mati getur allt gerst í kvöld,“

Aðspurður um hvernig Blikar munu nálgast leikinn segir Ásmundur:

„Við þurfum að nálgast verkefnið ekkert ósvipað og við gerðum í bikarúrslitaleiknum, nema að halda kannski orkustiginu betur út leikinn. Við áttum fínan fyrri hálfleik en koðnuðum niður í seinni og það má ekki gerast,“

Leikur Vals og Breiðabliks hefst klukkan 19:15 og verður í beinni útsendingu á Stöð 2 Sport.