Styrkurinn nemur 30 milljónum íslenskra króna og mun Össur nýta hann til að útvega Úkraínumönnum í neyð nauðsynleg stoðtæki. Ekki nóg með það heldur hefur fyrirtækið auk þess þjálfað úkraínska sérfræðinga í stoðtækjafræðum svo hægt sé að fylgja málinu vel eftir og lagt til talsvert fjármagn, svo heildarframleiðnin nemur um 100 milljónum króna.
„Það sem er mikilvægt í þessu er að búa til einhvers konar varanlega lausn fyrir einstaklinga. Það er ekki nóg að gefa vörurnar, það þarf að vera þjónusta, það þurfa að vera sérfræðinga [til staðar] til að hjálpa þessum einstaklingum að komast af stað og viðhalda gerviútlimnum,“ segir Sveinn Sölvason forstjóri Össurar í Bítinu á Bylgjunni.
Össur hafi nú þjálfað tíu úkraínska sérfræðinga til að aðstoða Úkraínumenn sem misst hafa útlimi og búið er að byggja fætur fyrir tíu einstaklinga en margir bíði enn.
„Varlega áætlað eru þetta í kring um þúsund manns í Úkraínu [sem bíða]. Bæði hermenn og almennir borgarar sem hafa lent í að missa annað hvort fót eða hendi og þetta er okkar markmið. Við viljum leggja okkar af mörkum í að lina þjáningar þessa fólks með því að koma til móts við þessa einstaklinga með varanlegri lausn,“ segir Sveinn.
Bað kærustunnar á sjúkrabekknum
Hann segir þessa þjónustu hafa gríðarleg áhrif á fólk, líkamleg en ekki síst andleg.
„Við vorum að þjálfa úkraínska stoðtækjasérfræðinga í Noregi og fengum hermann frá Úkraínu sem hafði misst fótinn til þess að fá lausn. Kærastan hans kom með honum og hann varð svo ótrúlega glaður að fá þessa nýju lausn og gleðin var svo mikil að hann bað kærustunnar sinnar þarna á sjúkrastofunni í Osló. Þannig að það sem við gerum hefur almennt mikil áhrif á líf fólks og það er stór hluti af fyrirtækinu og er mjög mikilvægt fyrir okkur.“
Verkefnið sé stórt en hluta af nýjum gerviútlim þurfi að sérsníða fyrir hvern einstakling.
„Stúfurinn er misjafn í stærð og lögun fyrir hvern einasta einstakling og það þarf að sérsmíða þann hluta. Þar býr Össur yfir sérstakri tækni, sem eina fyrirtækið á markaðnum sem er í stakk búið til að búa til þennan sérsmíðaða hluta á mjög skilvirkan og einfaldan hátt,“ segir Sveinn.
Þessi tækni geri Össuri kleift að smíða nýjan sérsniðinn útlim á aðeins tveimur til þremur klukkustundum.
„Þessi tækni er einstök og gerir okkur kleift að sinna verkefnum eins og þessu í Úkraínu.“
