Haraldur vildi verða skattakóngurinn

Tryggvi Páll Tryggvason skrifar 18. ágúst 2022 17:50

Haraldur Ingi Þorleifsson, sem var næstlaunahæsti Íslendingurinn á síðasta ári, segist hafa vonast til þess að verða skattakóngur Íslands fyrir síðasta ár.

Tekjublað Frjálsrar verslunar kom út í morgun. Þar kom fram að Haraldur, sem seldi hönnunarfyrirtæki sitt Uneo til Twitter á síðasti ári, hafi verið með um 107 milljónir króna í mánaðarlaun á síðasta ári.

Aðeins Magnús Steinarr Norðdahl, fyrrverandi forstjóri LS Retail, var launahærri en Haraldur, með tæplega 118 milljónir í launatekjur á mánuði. Bandaríska fyrirtækið Aptos keypti LS Retail á síðasta ári.

Í færslu á Twitter skrifar Haraldur Örn að hann hafi vonast til þess að verða efstur á lista.

„Ég var að vona að ég yrði sá sem greiddi hæstu upphæðina í skatta á síðasta mánuði,“ skrifar Haraldur og bætir við að hann sé stoltur af því að greiða til baka til samfélagsins sem veitti honum ókeypis menntun og heilbrigðisþjónustu.

Every year tax records in Iceland are made public.

I was hoping I’d be the person that paid the highest amount in taxes last year.

But I was number 2 and I proudly accept that honor to pay back to the society that gave a working class disabled kid free education and healthcare.
— Halli (@iamharaldur) August 18, 2022

Fram hefur komið að Haraldur ákvað að greiða skatta af sölunni hér á landi til þess að greiða sinn hlut af samneyslunni, þvert á ráðleggingar skattaráðgjafa. Þá fór hann fram á það við Twitter að kaupverðið yrði greitt sem launagreiðslur en með því hámarkaði hann þá skatta sem hann borgaði af sölunni.

Hann hefur vakið mikla athygli undanfarið fyrir að láta fé af hendi rakna til hinna ýmsu málefna. Hann kom á fót verkefnunum Römpum upp Reykjavík og Römpum upp Ísland, sem miða að því að auka hjólastólaaðgengi. Þá vakti athygli þegar hann bauðst til að greiða mögulegar skaðabætur þeirra sem Ingólfur Þórarinsson kærði fyrir meiðyrði.

Tekjublað Frjálsrar verslunar kom út í dag en rétt er að árétta að um er að ræða útsvarsskyldar tekjur á árinu 2021 og þurfa þær ekki að endurspegla föst laun viðkomandi. Munurinn getur falist í launum fyrir setu í nefndum og önnur aukastörf og hlunnindi vegna kaupréttarsamninga. Í launum sumra kann að vera falinn bónus vegna ársins 2020 sem var greiddur árið 2021.

Miðað er við útsvarsstofn samkvæmt álagningarskrá en í tölunum eru ekki fjármagnstekjur, til dæmis af vöxtum, arði eða sölu hlutabréfa. Sleppt er skattfrjálsum dagpeningum, bílastyrkjum og greiðslum í lífeyrissjóði. Þá ber að hafa í huga að inn í tekjunum geta líka verið einskiptisgreiðslur vegna úttektar á séreignasparnaði hjá lífeyrissjóði.

Verktakagreiðslur flokkast ekki sem útsvarsskyldar tekjur og eru því ekki teknar fyrir í álagningaskrá Ríkisskattstjóra sem Tekjublaðið styðst við.

Tekjur Skattar og tollar

Tengdar fréttir

Twitter kaupir íslenskt fyrirtæki

Bandaríski samfélagsmiðillinn Twitter hefur keypt íslenska tækni- og hönnunarfyrirtækið Ueno sem stofnað var árið 2014 og hefur vaxið hratt undanfarin ár.

6. janúar 2021 15:20

Magnús er skattakóngur ársins 2021: Með tæplega 118 milljónir á mánuði

Magnús Steinarr Norðdahl, fyrrverandi forstjóri LS Retail var launahæsti Íslendingurinn árið 2021 með tæplega 118 milljónir króna í launatekjur á mánuði.

18. ágúst 2022 09:31

Ísland verður rampað upp með þúsund römpum

Átaksverkefnið „Römpum upp Ísland“ hófst formlega í dag en tilgangur verkefnisins er að setja upp þúsund rampa um land allt til að auðvelda hreyfihömluðum að komast ferða sinna. Verkefnið kostar um fjögur hundruð milljónir króna og mun taka fjögur ár.

11. mars 2022 21:03

„Stærsta sorg sem ég hef lent í“

Haraldur Ingi Þorleifsson stofnaði sitt eigið fyrirtæki í stofunni heima hjá sér árið 2014. Hugmyndin var þá að stofna lítið félag utan um þau verkefni sem hann var sjálfur að vinna í lausamennsku sem hönnuður á ýmiskonar vefsíðum, öppum og öðru skjáefni.

17. febrúar 2022 10:32