Minnast Oliviu Newton-John: „Þinn Danny, þinn John“

Þinn Danny

Olivia er líklega  þekktust fyrir glæstan tónlistarferil og leik sinn í kvikmyndinni Grease frá árinu 1978 þar sem hún fór með hlutverk Sandy Olsson. Það var leikarinn John Travolta sem lét Danny Zuko á móti henni. 

John sendi Oliviu fallega kveðju eftir að hún kvaddi þennan heim. Eiginkona hans, Kelly Preston, dó fyrir tveimur árum eftir tveggja ára baráttu við brjóstakrabbamein en einnig höfðu hjónin John og Kelly misst elsta son sinn árið 2009.

„Mín kæra Olivia, þú gerðir líf okkar allra miklu betra. Áhrifin sem þú hafðir voru ótrúleg. Ég elska þig svo mikið. Við sjáumst aftur þegar líður á veginn og við verðum öll saman á ný,“ sagði hann í kveðjunni og endaði á:

„Þinn frá augnablikinu sem ég sá þig fyrst og að eilífu! Þinn Danny, þinn John!“

Rizzo sendir hlýjar kveðjur

„Ég veit ekki hvort ég hafi þekkt yndislegri manneskju,“ sagði leikkonan Stockard Channing í yfirlýsingu til People. Stockard fór með hlutverk Betty Rizzo í kvikmyndinni Grease.  „Olivia var kjarninn í sumrinu, birtan hennar, hlýjan hennar og náðin er það sem kemur alltaf upp í hugann þegar ég hugsa til hennar,“ sagði hún og bætti við:

„Ég mun sakna hennar gríðarlega."

Minnast hennar sem fyrirmynd og fyrsta skotið

Á samfélagsmiðlum minnast stjörnur utan kvikmyndarinnar frægu hennar einnig en hér að neðan má sjá nokkrar af þeim fjölmörgu kveðjum:

Gabrielle Union sagði meðal annars „Grease er mín #1 mynd allra tíma og gerði mig að ævilöngum Oliviu Newton John aðdáanda“. Einnig sagðist hún hafa horft á Xanadu ásamt systur sinni oftar en hún geti talið. „Sendi svo mikla ást og bænir til gjafarinnar sem hún var og hæfileikabúnt.“

Kate Hudson lýsti því í kveðju hversu mikill innblástur Olivia var fyrir sig í kvikmyndaheiminum og hvernig hún reyndi að syngja lögin hennar á sama hátt og hún. „Takk fyrir að deila ljósinu þínu með heiminum sem hreyfði við og mótaði litlar stelpur eins og mig,“ sagði hún einnig og hvetur alla til þess að syngja í minningu hennar. 

Hugh Jackman sagði kynni sín við Oliviu hafa verið ein mestu forréttindi lífs síns „Hún var ekki bara hæfileikaríkasta manneskjan sem ég þekki, hún var líka með stærsta hjartað, gjafmild og fyndin,“ sagði hann og bætti við: „Það er ekkert leyndarmál að Olivia var fyrsta skotið mitt. Ég kyssti plakat af henni á hverju kvöldi áður en ég fór að sofa. Arfleifð hennar verður aðeins sterkari á komandi árum.“

James Gunn sem er leikstjóri Marvel myndanna Guardians of the Galaxy minnist hennar einnig sem fyrsta alvöru skotsins síns sem barn. „Af tilviljun keypti ég einnig og bjó í dásamlega húsinu sem hún byggði í Malibu. Megi hún hvíla í friði.“