Upplifun íbúa að skjálftinn í gær hafi verið sá kröftugasti á síðustu árum

Grindvíkingar virðast vera orðnir öllu vanir eftir langt tímabil af skjálftum en skjálftarnir sem nú mælast eru stærri en oft áður. Erla Ósk Pétursdóttir, íbúi í Grindavík, segir erfitt að venjast því.

„Krakkarnir verða alltaf pínu skelkaðir og dýrin líka, en við bara tökum þessu einn dag í einu. Þessi skjálfti í gær var náttúrulega rosalega stór, þetta var svona stærsti sem ég hef fundið, þó það hafi verið af nógu að taka og það svona gerði mann aðeins órólegan,“ segir Erla.

Hún segir mynd hafa brotnað og að hlutir hafi hrunið úr hillum í stóra skjálftanum en ekki mikið fleira. Þá bendir hún á að Grindvíkingar séu undirbúnir fyrir reglulega skjálfta.

„Húsin eru bara þannig núna að það er ekkert mikið sem getur dottið á fólk í svefni eða neitt svona,“ segir Erla og bætir við að húsin sjálf séu sterk. „Við erum bara þakklát fyrir að vera með sterk hús, það er það sem við segjum, og krakkarnir eru rosalega ánægð með það, hvað við erum örugg samt.“

„Ég held að við séum alveg komin á það núna að það má bara fara að gjósa og hætta að hristast,“ segir Erla létt í bragði.

Vel fylgst með stöðunni

Fannar Jónasson, bæjarstjóri Grindavíkurbæjar, segir að skemmdir vegna skjálftans í gær hafi verið smávægilegar og engar upplýsingar séu um slys á fólki, sem sé fyrir öllu. Afveitulögn fór í sundur milli Svartsengis og Grindavíkurbæjar í gær og var því kaldavatnslaust í gærkvöldi en viðgerðum lauk í nótt.

Hann tekur undir það að skjálftinn hafi verið kröftugur.

„Skjálfti sem er yfir fimm að stærð, hann er auðvitað bara talsvert öflugur og hann var nú bara rétt við bæjarmörkin hjá okkur auk þess, þannig að það er upplifun fólks hér að þetta hafi verið sterkasti skjálftinn til þessa í þessum hrinum sem að hafa staðið yfir svona með hléum í tvö og hálft ár,“ segir Fannar.

Einhverjir séu skelkaðir í bænum vegna skjálftanna en hann ítrekar að flestir séu vel undirbúnir. „Auðvitað er þetta bara mjög óþægileg tilfinning að þetta sé að taka sig upp, við höfðum gjarnan viljað vera laus við þetta en svona er nú bara staðan,“ segir hann.

Almannavarnarnefnd fundar ásamt stórum hóp nú í hádeginu til þess að fara yfir stöðu mála en talið er að ný innskotavirkni sé hafin í kringum ganginn sem myndaðist við eldgosið í Geldingadölum..

„Viðbragðsáætlanir eru í sjálfu sér allar til og við erum reynslunni ríkari en engu að síður þá vilja menn bara fara yfir hlutina eins og þeir eru, við fáum líka upplýsingar frá vísindasamfélaginu. Þannig við erum bara að reyna að undirbúa okkur sem best og afla okkur sem bestrar vitneskju,“ segir Fannar.

„Það er fylgst með þessu og við látum vita ef að eitthvað fer að gerast meira heldur en nú er orðið. Þannig við bíðum átekta en erum bara í viðbragðsstöðu,“ segir hann enn fremur.