„Ég er stærsti aðdáandi hennar“

Blaðamaður fékk að heyra meira um þetta skemmtilega samstarf:

Hvernig var að vinna saman að þessu verkefni?

Mér fannst frábært að fá Blævi inn í þetta og ég heyrði alltaf röddina hennar fyrir mér þegar ég var að skrifa Freyju. Ég er stærsti aðdáandi hennar og það var algjör draumur að fá hana til að vera með í Ævintýrinu. Blær hefur á stuttum tíma sannað sig sem ein allra besta leikkona þjóðarinnar og hún er einstaklega góður lesari.

Var aukin pressa að tala inn á sögu með tengdadóttur sinni?

Nei ekki get ég nú sagt það. Það var bara fyrst og fremst gleðiefni og tækifæri til að vinna saman sem er alltaf ánægjulegt.

Hvað einkennir söguna?

Ja stórt er spurt. Ævintýri Freyju og Frikka eru spennusögur þar sem krakkarnir þurfa að bjarga málunum og mig langaði til að hafa þær í klassískum anda spennusagna á borð við Frank og Jóa eða Enid Blyton bækurnar. Það eru þær sögur sem ég ólst upp við og lá yfir langt fram á nætur. 

Mig langaði líka að setja málefni samfélagsins og umhverfismál í forgrunn án þess að vera prédikandi auk þess að kynna fjarlæga og framandi staði fyrir lesendum mínum og hlustendum. 

„Við fjölskyldan höfum ferðast til ýmissa staða á heimskringlunni og sú reynsla nýtist mér vel.“

Hvernig viðbrögð hafa hljóðbækurnar verið að fá?

Ég er afskaplega þakklátur fyrir þessi sterku viðbrögð sem ég hef fengið við fyrstu bókinni og það hefur sannarlega hvatt mig áfram við skrifin á þeirri næstu. Við stefnum á að það verði fjórar bækur í þessum flokki um Freyju og Frikka en miðað við viðbrögðin er aldrei að vita hvað gerist í framhaldinu.