Greiða for­ráða­mönnum barna á bið­lista eftir leik­skóla­plássi

Bæjarráð Garðabæjar samþykkti greiðslurnar á fundi sínum í dag. Forráðamenn barna geta með reglunum sótt um þátttöku bæjarins í kostnaði vegna vistunar barns þar til því býðst vistun á leikskóla í bænum svo lengi sem þeir njóti ekki annarra niðurgreiðslna, að því er segir í tilkynningu frá Garðabæ.

Reglunum er sagt ætlað að brúa bilið frá fæðingarorlofi þar til barn fær vistun í leikskóla. Börn sem eru orðin tólf mánaða gömul og hafa ekki fengið boð um vistun falla undir skilgreiningu reglnanna.

Greiðslurnar miðast við almenna niðurgreiðslu hjá dagforeldrum fyrir átta stunda vistun, 90.269 krónur á mánuði. Þær falla niður þegar barni býðst leikskóladvöl í Garðabæ.

Næst úthlutar bærinn leikskólaplássum í vikunni eftir verslunarmannahelgi. Þá verður börnum sem eru fædd í júní, júlí og ágúst 2021 boðin dvöl.