Mann­réttindi og manns­líf mikil­vægari en „pólitískar fantasíur gamals manns“

Andrei Menshenin, rússneskur blaðamaður, og Victoria Bakshina, rússneskur málfræðingar, voru meðal þeirra rússnesku ríkisborgara sem voru viðstödd á mótmælunum við sendiráðið í dag. 

„Þetta er sameiginlegt átak okkar til að sýna að það sé til annars konar Rússland og milljónir Rússa sem styðja ekki þetta tilefnislausa stríð,“ segir Andrei.

Hann lýsir því að það hafi verið áfall fyrir marga Rússa þegar innrásin hófst og leynir hann því ekki að það sé átakanlegt að horfa upp harmleikinn í Úkraínu. Þetta tekur Victoria undir. 

„Fyrst var ég mjög reið og leið og ég var bókstaflega að biðja að þessu stríði linni, en núna þar sem við sjáum að hörmungar eru enn þá í gangi, herinn er ekki afturkallaður, þá finnst mér mjög mikilvægt að þegja ekki,“ segir hún. 

Á þessum tímapunkti séu orðin þeirra sterkustu vopn og mikilvægt að vekja athygli á glæpum Pútín stjórnarinnar í Úkraínu, sem og glæpum þeirra gegn eigin borgurum. 

„ Við verðum að tala, við verðum að vera hávær, og okkar helsta von er að þessu stríði ljúki sem fyrst,“ segir hún. 

Kallaði mótmælendur „fatlaða bastarða“

Stríðið hefur nú staðið yfir í á fjórða mánuði en Andrei er þó ekki bjartsýnn á að endalok stríðsins séu í nánd. „Ég held að þessu stríði muni ekki ljúka innan næstu mánaða, ég held að það vari í fleiri ár, og afleiðingarnar þessa stríðs verða skelfilegar fyrir Rússland líka,“ segir hann. 

„Sumir Rússar segjast jafnvel skammast sín fyrir að vera rússneskir. Ég er ekki sammála því. Ég skammast mín ekki fyrir að vera Rússi en skammast mín fyrir aðgerðir rússneska ríkisins,“ segir hann enn fremur.

Victoria segir þá að Rússland muni aldrei aftur geta snúið aftur í fyrri mynd. „Þetta verður einhvers konar arfleið þessa tímabils en við þurfum líklegast frekar mikinn tíma til að jafna okkur,“ segir hún. 

Aðspurður um hvort hann vilji snúa aftur til Rússlands á einhverjum tímapunkti segir Andrei að hann vilji það að sjálfsögðu. Skömmu eftir þá spurningu gekk maður fram hjá honum og yrti á hann á rússnesku. „Hann sagði að við værum fatlaðir bastarðar,“ útskýrir Andrei.

„Eins og þú sérð þá styðja okkur ekki allir Rússar en engu að síður teljum við okkur vera að gera það rétta í stöðunni. Við stöndum fyrir mannúðleg gildi, fyrir mannréttindi, mannslíf og það er mikilvægara en pólitískar fantasíur eins gamals manns,“ segir hann enn fremur eftir að hafa melt ummælin.

Ekkert lát á árásum Rússa í austri

Rússar létu stórskotum og eldflaugum rigna yfir borgi og bæi í Luhansk og Donetsk héruðum í Úkraínu dag og nótt, í tilraun sinni til ná fullum yfirráðum yfir Donbas svæðinu þar sem er að finna gífuregar olíu- og gasauðlindir sem Pútín vill ná á sitt vald. 

Úkraínuher heldur enn aftur af Rússum en sárvantar þungvopn frá Vesturlöndum sem munu berast þeim á næstu vikum.

„Munið þið hvernig Rússar vonuðust til að ná öllu Donbas í byrjun maí? Nú er 108. dagur stríðsins, það komið fram í júní. Donbas þraukar enn. Mannfallið hjá innrásarliðinu, þar á meðal á þessu svæði, er verulegt. Samtals hefur rússneski herinn misst um 32 þúsund menn. Til hvers? Hvað hefur það fært þér, Rússland?“ spurði Vólódímír Selenskí, forseti Úkraínu.

Hátíðardeginum var fagnað um allt Rússland og jafnvel á sumum herteknum svæðum austast í Úkraínu. Vladímír Pútín, forseti Rússlands, heiðraði fólk af ýmsum sviðum samfélagsins að þessu tilefni í Kreml í dag og sagði Rússa stolta af sögu sinni og vongóða um framtíðina.

„Í dag erum við sérstaklega meðvituð um það hversu mikilvægt það er fyrir föðurlandið, fyrir samfélag okkar, að þjóðin standi saman,“ sagði Pútín.