Skessuhorn greindi fyrst frá ráðningunni en Stefán Broddi, sem er með BA gráðu í stjórnmálafræði og próf í verðbréfaviðskiptum, hefur frá árinu 2019 verið sérfræðingur í markaðsviðskiptum hjá Arion banka. Þar áður stýrði hann greiningardeild bankans um nokkurra ára skeið.
Stefán Broddi er uppalinn í Borgarnesi og bjó þar fram á þrítugsaldurinn. „Það reyndist mér afar gott veganesti út í lífið að alast upp í Borgarnesi. Ég er sveitarstjórn og íbúum afar þakklátur fyrir tækifærið og mun leggja mig allan fram um að standa mig. Tækifærin í Borgarbyggð eru óþrjótandi,“ er haft eftir honum í frétt Skessuhorns.
Framsóknarflokkurinn fékk hreinan meirihluta í síðustu sveitarstjórnarkosningum og ákvað að Þórdís Sif Sigurðardóttir, sem hefur verið sveitarstjóri í Borgarbyggð, yrði ekki endurráðin.
Áður en Stefán Broddi tók til starfa í Arion banka var hann hjá Straumi fjárfestingabanka í markaðsviðskiptum og sem forstöðumaður eigin viðskipta bankans á Íslandi á árunum 2008 til 2011. Þá var hann fjárfestingastjóri Exista 2006 til 2008 auk þess að hafa starfað áður sem sérfræðingur í greiningum hjá Íslandsbanka og sem blaðamaður á Viðskiptablaðinu um skeið.
