Tommi Steindórs stýrir Streetballmóti á Klambratúni

Spilað verður upp á peninga og er skráning í fullum gangi inni á tix.is. Mótsstjórn verður í öruggum höndum Tomma Steindórs, dagskrárgerðarmanns á X977 og annars umsjónarmanna þáttarins Boltinn lýgur ekki. Tommi lofar trylltri stemmingu.

„Það er ekki ein dauð stund í körfuboltaleik og sérstaklega ekki í götubolta þar sem spilað er upp á tíma. Ég sé til þess að þarna verður eintóm gleði, búinn að panta góða veðrið og það verður tónlist og Subway og allt fljótandi í Red Bull. Þetta verður Íslandsmeistaramótið í götubolta,“ segir Tommi.

Skipulagið er einfalt, fjórir leikmenn í liði og þrír inná í einu. Spilað verður í riðlum og tvö efstu liðin fara áfram í æsispennandi útsláttarkeppni.

„Það verða engir dómarar, sóknin dæmir en ég verð með augun á öllum og alráður, ef upp koma vafamál sker ég úr um þau. Það má auðvitað rífast en ef allt fer í vitleysu mæti ég.“

Ekkert aldurstakmark er á þátttöku og allir geta tekið þátt, eða hvað?

„Ekki úrvalsdeildarleikmenn og ég þekki þá alla þannig að það þýðir ekkert að svindla sér. Þó horfi ég mögulega framhjá bekkjarsetumönnum sem fá lítið að spila. 

En annars vil ég sjá sem flesta taka þátt, gamla og unga, konur og kalla, blönduð lið og allskonar. Einu kröfurnar sem ég set er að liðið mæti í samstæðum búningum, engum ósamstæðum lörfum.

Ég veiti verðlaun fyrir ýmislegt meðal annars flottustu búningana, flottasta liðsnafnið, flottustu tilþrifin, háttvísiverðlaun og það er til mikils að vinna. Skráningin fer mjög vel af stað og því um að gera að tryggja sér pláss sem fyrst,“ segir Tommi og hvetur fólk einnig til að fjölmenna í áhorfendabrekkuna á Klambratúni, mótið verði frábær skemmtun.

„Karfan er reyndar að taka fram úr handbolta sem næst vinsæalsta íþrótt landsins en síðan þátturinn Körfuboltakvöld hóf göngu sína á Stöð 2 árið 2015 hefur verið stöðugur uppgangur í körfunni. Stöð 2 Sport sýnir einnig beint frá úrslitum NBA sem verða einmitt í hámarki þegar Streetballmótið fer fram Það er einfaldlega mikill körfuboltahugur í þjóðinni.“