Að­setur Vatna­jökuls­þjóð­garðs verður flutt til Hafnar

Í tilkynningu á vef Stjórnarráðsins segir að ákvörðun um flutninginn hafi verið tekin í samráði við stjórn þjóðgarðsins og að hún verði kynnt á næstunni á Alþingi.

Meginstarfsstöðvar Vatnajökulsþjóðgarðs eru staðsettar á Höfn í Hornafirði, Kirkjubæjarklaustri, Skriðuklaustri, í Ásbyrgi, Mývatnssveit og Skaftafelli. Lögheimili þjóðgarðsins hefur verið í Garðabæ og hafa framkvæmdastjóri, fjármálastjóri og þrír aðrir starfsmenn miðlægrar skrifstofu haft starfsstöð þar.

Framkvæmdastjóri mun framvegis hafa aðalstarfstöð á Höfn í Hornafirði.

Það mun verða nýr framkvæmdastjóri sem flytur á Höfn en Magnús Guðmundsson núverandi framkvæmdastjóri Vatnajökulsþjóðgarðs mun 1. september næstkomandi flytjast í starf sérfræðings í umhverfis-, orku- og loftslagsráðuneytinu.

„Vatnajökull er ekki á höfuðborgarsvæðinu og ég hef aldrei skilið hvers vegna lögheimili þjóðgarðsins er á höfuðborgarsvæðinu. Nú þegar ég er í aðstöðu til breyta þessu þá geri ég það og flyt með því mikilvæg störf á landsbyggðina. Styrking starfsstöðva stofnana ráðuneytisins á landsbyggðinni verður að sama skapi eitt af lykilatriðunum í þeirri vinnu sem fram undan er varðandi styrkingu og einföldun stofnanaskipulags ráðuneytisins,“ segir Guðlaugur Þór Þórðarson, umhverfis-, orku- og loftslagsráðherra um flutninginn.