Tæplega tvö þúsund manns búa í atvinnuhúsnæði

Eftir hinn hörmulega bruna á Bræðaborgarstíg árið 2020 þar sem þrír íbúar af tugum skráðra til búsetu þar létust réðust Húsnæðis- og mannvirkjastofnun, Slökkvilið höfuðborgarsvæðisins og Alþýðusambandið í að kortleggja hversu margir búa í atvinnuhúsnæði á höfuðborgarsvæðinu og hvernig brunavörnum væri háttað.

Hópur fólks sem talar að minnsta kosti sjö tungumál var fenginn til að kanna stöðuna í öllu skráðu atvinnuhúsnæði á svæðinu og voru niðurstöðurnar kynntar í dag.

Á miðjum blaðamannafundi um íbúa í atvinnuhúsnæði sem fram fór í slökkvistöðinni í Skógarhlíð með slökkviliðsbíl í bakgrunni kom útkall hjá slökkviliðinu. Þannig varð að gera stutt hlé á fundinum. Útkallið reyndist sem betur fer ekki alvarlegt og voru slökkviliðsmenn komnir til baka áður en blaðamannafundinum lauk.

Regína Valdimarsdóttir teymisstjóri brunavarna hjá Húsnæðis- og mannvirkjastofnun segir að í dag búi nærri helmingi færri íatvinnuhúsnæði en þegar staðan var könnuð árið 2017.

„Það eru 1.868 einstaklingar búsettir íatvinnuhúsnæði. Að við skyldum ná samtali við um helming þeirra gefur okkur í raun góða mynd af þeirra stöðu. Við erum bæði aðkortleggja ástand brunavarna og félagslegar aðstæður íbúanna. Núna erum við að fá ákveðna innsýn í félagslegar aðstæður íbúa í atvinnuhúsnæði,“ segir Regína.

Um 24 prósent íbúanna væru Íslendingar en aðrir erlent launafólk. Þar af um 33 prósent Pólverjar og tólf prósent Litháar. Íslendingarnir byggju flestir í eigin atvinnuhúsnæði en útlendingarnir væru leigjendur.

„Það er í raun og veru ekki hægt að draga upp einhlíta mynd af búsetu íatvinnuhúsnæði. Þær eru mjög breytilegar. Það getur bæði verið þannig að húsnæðið er í góðu standi en brunavarnir er í ólagi. Svogetur húsnæðið ekki litið sérlega vel út en brunavarnir verið í lagi,“ segir Regína.

Í skýrslunni er því velt upp að fólk geti skráð sig til búsetu í atvinnuhúsnæði. Dagur B. Eggertsson formaður stjórnar slökkviliðsins segir aðalatriðið að gæta að öryggi fólks.

„Frá sjónarhóli slökkviliðsins er algert lykilatriði að öll búseta sé skráð. Við þurfum að getað vitað ef kviknar í einhvers staðar hvort þurfi að fara inn og bjarga fólki,“ segir Dagur.

Drífa Snædal forseti Alþýðusambandsins segir ekki koma á óvart að meirihluti íbúanna sé láglaunafólk. Byggja þurfi meira fyrir láglaunafólk.

„Ef öryggiskröfum er fullnægt í þessu ástandi sem við erum í núna er allt í lagi að veita tímabundna skráningu í atvinnuhúsnæði. Bara til þess að fólk sé öruggt einhvers staðar. Geti fengið póstinn sinn húsaleigubætur og svo framvegis,“ segir Drífa.