Vill hitta Sout­hgate til að ræða um­mæli og á­hyggjur hans

Southgate sagði fyrr í þessum mánuði að það væri mikil skömm fólgin í því að ýmis mál kæmu í veg fyrir að ekki treysti allt stuðningsfólk Englands sér til þess að fylgja þjóð sinni og styðja við bakið á henni í Katar. 

Benti landsliðsþjálfarinn á það að samkynhneigð væri til að mynda bönnuð í Katar sem og í nágrannalöndum, einnig væri staða LGBTQ+ fólks langt frá því að gera góð og þá ræddi hann stöðu verkamanna í Katar en gríðarleg uppbygging hefur þurft að eiga sér stað til að hægt sé að halda HM í landinu á tilsettum tíma.

Amnesty International, alþjóðleg góðgerðasamtök, hafa heimildir fyrir því að brotið hafi verið á réttindum þúsunda verkamanna frá því að framkvæmdir hófust vegna HM.  Ríkisstjórn Katar þvertekur fyrir það en undanfarin misseri hafa borist reglulegar fréttir af bágri stöðu verkafólks í landinu.

Al-Khater er vægast sagt ósáttur með ummæli Southgate og segir mann í hans stöðu verða að velja orð sín betur.

„Ég tel að áður en hann geti sagt eitthvað um aðbúnað verkamanna þá verði hann að koma hingað og ræða við þá. Þannig getur hann skilið hvað verkamennirnir fá út úr því að vera hér.“

Dregið verður í riðlakeppni HM á föstudaginn kemur og stefnir Al-Khater á að ræða málin við Southgate þá.

„Ég hlakka til að bjóða hann velkominn og ræða við hann um skoðanir mínar. Hann þarf ekki að vera sammála þeim en hann þarf að skilja mismunandi skoðanir og menningarheima,“ sagði Al-Khater að endingu.

Síðan ljóst var að Katar myndi halda HM 2022 hefur Alþjóðaknattspyrnusambandið, FIFA, verið harðlega gagnrýnt. Eftir að rannsóknir hófust á því hvernig Katar var valin fram yfir aðrar þjóðir sem vildu halda mótið hafa ýmsir háttsettir meðlimir FIFA sagt að það hafi verið mistök að halda mótið í Katar. Þar á meðal Sepp Blatter, fyrrverandi forseti sambandsins.