Mjög sáttur með frammistöðu sinna manna

„Þetta var verðskuldaður sigur. Við höfum spilað mikið af leikjum að undanförnu. Aðeins þremur dögum eftir einvígi í Meistaradeild Evrópu þarftu að spila leik í allt öðruvísi keppni með allt öðruvísi leikplan,“ sagði Tuchel í viðtali eftir leik.

„Strákarnir voru mjög einbeittir og áttu sigurinn skilið. Ég vil hrósa liði mínu, ég er mjög ánægður með frammistöðuna í dag,“ bætti hann við.

„Við verðum að sætta okkur við þær aðstæður sem við erum í. Það er ekkert sem við getum gert til að breyta þeim, það er ekki í okkar höndum. Það sem er í okkar höndum er að setja fordæmi á vellinum. Við verðum að sýna liðsanda og rétt hugarfar, það er mjög mikilvægt,“ sagði Tuchel einnig og átti þar við þær aðstæður sem Chelsea er í.

Roman Abramovich er að reyna selja félagið og takmarkanir frá bresku ríkisstjórninni koma í veg fyrir ýmislegt sem einkennir topplið á Englandi.

„Ég vona að söluferlið fari fljótt í gegn svo við getum farið að einbeita okkur að framtíðinni,“ sagði Tuchel að endingu.