Steinunn Anna Radha gekk í sértrúarsöfnuðinn Smárakirkju, áður Krossinn, í kring um 2015 þá fimmtán ára gömul. Hún sagði sögu sína í umfjöllun Kompáss um sértrúarsöfnuði í síðustu viku. Hún var beitt alvarlegu kynferðisofbeldi af unglingastarfsleiðtoga. Hann bauð Steinunni reglulega heim til sín og braut á henni þar og beitti hana líkamlegu ofbeldi til að „reka út djöflana sem gerðu hana samkynhneigða.”
Steinunn Anna sagði fordóma gegn samkynhneigð og ótta við syndina alltumlykjandi í Smárakirkju. Hún er sjálf samkynhneigð og því hafi verið tekið mjög illa innan kirkjunnar. Fyrrnefndur unglingaleiðtogi kom þar líka við sögu.
Sigurbjörg hefur tvívegis hafnað boði um viðtal en sendi frá sér yfirlýsingu í síðustu viku sem fjallað var um á Vísi. Unglingaleiðtoganum hefði aðeins verið við störf í þrjá mánuði, ekki væri hægt að skilgreina Smárakirkju sem sértrúarsöfnuð og þá væri mikið lagt upp úr að eyða mismunun í kirkjulegu starfi enda hefði oft hallað á hlut bæði kvenna og samkynhneigðra.
„Hér inni eru ekki rasistar,“ sagði Sigurbjörg í predikun sinni í gær þar sem hún snerti á umfjöllun Kompás sem hún telur ósanngjarna.
„Hefði ég fengið að velja það þá held ég að ég hefði kosið að vera frekar svört. Svart fólk, til dæmis, eldist betur. Nei, ég segi svona. Í alvöru talað. Hafið þið heyrt söngkonu, Whitney Houston? Halló! Ég vildi óska þess.“
Sigurbjörg nefnir að Ron nokkur Botha, sem hafi verið aðstoðarpastor hjá Smárakirkju, hafi verið þeldökkur.
„Þannig að þetta á ekki við rök að styðjast. Svo því sé algjörlega haldið til haga. Allt sem kemur í sjónvarpinu er ekki endilega rétt. Við erum ekki á móti hommum og lesbíum. Það er af og frá. Það eru allir velkomnir hérna.“
Að neðan má sjá brot úr predikun Sigurbjargar þar sem hún lætur þessi orð falla.
Steinunn tjáði Kompási á sínum tíma að það hefði verið illa séð að vera með húðflúr.
„Tattú, ég er sjálf með tattú. Þetta á bara ekki við rök að styðjast. Ég er reyndar með tattú í augabrúnunum. Mamma meira að segja líka,“ sagði Sigurbjörg og talaði til móður sinnar á fremsta bekk kirkjunnar. Mamma hennar leiðrétti dóttur sína og sagðist gera það sjálf.
„Nei, þú setur þetta sjálf. Allavega, það skiptir ekki máli. Þetta á bara ekki við rök að styðjast,“ sagði Sigurbjörg.
Guðsþjónustuna í gær má sjá að neðan.
