Ágúst Orri til sænsku meistaranna

Ágúst Orri, sem er 17 ára sóknarsinnaður miðjumaður, er uppalinn hjá Breiðabliki og náði að leika einn leik með liðinu í efstu deild á síðustu leiktíð.

Hjá Malmö hittir Ágúst Orri fyrir íslensk/serbneska þjálfarann Milos Milojevic sem ráðinn var þjálfari meistaranna í vetur. Ágúst Orri mun þó til að byrja með æfa með U19-liði félagsins og hefur þegar hafið æfingar.

Ágúst Orri á að baki fimm leiki fyrir U17-landslið Íslands. Hann er annar ungi leikmaðurinn sem yfirgefur Breiðablik á skömmum tíma því áður hafði Galdur Guðmundsson verið kynntur sem nýr leikmaður FC Kaupmannahafnar.