Davíð Óskar leikstýrir nýrri glæpaþáttaröð sem gerist í Færeyjum

TROM er sköpunarverk Torfinn Jákupsson sem skrifar handritið í félagi við Donna Sharpe (West of Liberty) en þáttunum er leikstýrt af Davíð Óskari og Kasper Barfoed (Dicte) . Danski stórleikarinn Ulrich Thomsen er í aðalhlutverki í þáttunum.

Davíð Óskar hefur áður unnið að stórum verkefnum eins og Brot og The Valhalla Murders. Fyrsti þáttur TROM fer í loftið sunnudaginn 13. febrúar á Viaplay en þetta er fyrsta glæpaserían sem tekin er upp í Færeyjum, samkvæmt fréttatilkynningu frá streymisveitunni.

TROM er hrífandi glæpatryllir sem fjallar um tryggð, völd og órjúfanleg fjölskyldubönd. Auk Ulrich Thomsen, Maria Rich og Olaf Johannessen í aðalhlutverkum fara bæði færeyskir og danskir leikarar með helstu hlutverk, þar á meðal Helena Heðinsdóttir, Mariann Hansen, Sissal Drews Hjaltalin, Hans Tórgarð, Gunnvá Zachariasen og Búi Dam.

„Þegar Hannis Martinsson blaðamaður (Ulrich Thomsen) fær myndbandsskilaboð frá baráttukonunni Sonju á Heygga, sem ekki aðeins segist vera dóttir hans heldur einnig að hún óttist um líf sitt, snýr hann aftur heim til Færeyja til að kanna málið frekar. Honum verður fljótt ljóst að Sonja hefur horfið við dularfullar kringumstæður og hann flækist í leit þar sem sjómannasamfélagið á staðnum, áberandi hópur aktívista og ekki síst þekktur kaupsýslumaður í Færeyjum, Ragnar í Rong (Olaf Johannessen) kemur við sögu. Hannis lendir í útistöðum við lögregluna á staðnum og nokkrum sinnum þarf hann að snúa sér til lögreglukonunnar sem leiðir rannsóknina, Karlu Mohr (Maria Rich), þar sem hans uppgötvanir í málinu stangast á við niðurstöður lögreglunnar. Leit hans að svörum afhjúpar vef lyga og leyndarmála í litla samfélaginu,“ segir um söguþráðinn.

Upptökur á TROM fóru fram vorið og sumarið 2021 og fallegt en hrikalegt landslagið í Færeyjum er í stóru hlutverki og á sinn þátt í að drífa atburðarásina áfram. Davíð Óskar birti margar myndir á Instagram frá tökustaðnum. TROM er í sex hlutum en þáttaröðin er byggð á metsölubókum eftir hinn margverðlaunaða færeyska rithöfund Jógvan Isaksen. “