Andrés vill 2. sæti á lista VG í borginni

Í tilkynningu frá Andrési segir að hann hafi tekið virkan þátt í starfi hreyfingarinnar allt frá stofnun hennar árið 1999 og gengt margvíslegum trúnaðarstörfum á þeim vettvangi. Hafi hann meðal annars átt sæti í stjórn Vinstri grænna síðustu fimm ár.

Þá segir að hann hafi umtalsverða reynslu af sveitarstjórnarmálum og setið í meirihluta í sveitarstjórn Djúpavogshrepps í samfellt sextán ár og þar af lengst af sem oddviti.

„Á þeim tíma öðlaðist ég dýrmæta reynslu og innsýn í stjórnsýsluna á breiðum grunni ekki síst í samskiptum við ríkisvaldið og fjölmargar undirstofnanir þess sem hefur veitt mér haldgóða sýn á stjórnkerfið í stóru myndinni. Þá hef ég gengt fjölmörgum öðrum trúnaðarstörfum í stjórnum nefndum og ráðum bæði á vettvangi sveitarfélaga og innan stofnanna ríkisins.

Í dag á ég m.a. sæti í stjórn ÍSOR og þá einnig gegni ég stöðu formanns Fornminjanefndar þar sem ég hef brennandi áhuga á minjaverndarmálum og hef komið að mörgum slíkum verkefnum á liðnum árum. Ég vinn einnig í hlutastarfi hjá Landvernd þar sem ég á sömuleiðis kost á að sameina áhugamál mál mín og vinnu sem lúta að umhverfis- og náttúruvernd sem eru mér mikið hjartans mál. Að öðru leyti hef ég unnið við mörg og fjölbreytt störf um ævina ásamt virkri þátttöku í félagsmálum meðal annars er varðar ungmenna- og íþróttastarf.

Ég tel mig vera á besta aldri og hef gaman að takast á við nýjar áskoranir sem eru til þess fallnar að bæta samfélagið.

Ég er fæddur 1963, giftur og á þrjú uppkomin börn og 7 barnabörn, ég flutti alfarið búferlum til Reykjavíkur árið 2019 þar sem fjölskyldan býr öll í dag.

Ég bý í Úlfarsárdal þar sem ég kann afar vel við mig í nálægð við náttúruna sem ég nýt þess að upplifa þegar ég á þess kost. Áhugamálin eru mörg en fyrir utan vinnuna sjálfa hverju sinni, þá eru það útivist - náttúruupplifun ásamt ljósmyndun sem eiga minn hug þegar ég á lausar stundir.

Helstu baráttumál mín ef mér yrði veitt brautargengi á þessum vettvangi snúa helst að umhverfis- og skipulagsmálum í borginni og þar er af mörgu að taka, en skipulagsmálin snerta að því er má segja alla innviði samfélagsins og framtíðarsýn. Þá vil ég vinna að því að búa þeim sem höllustum fæti standa í samfélaginu, fleiri tækifæri og betri lífsgæði með bættri þjónustu sem borginni ber að veita. Ég vil að börnum verði tryggð aðkoma að félags- og íþróttastarfi óháð efnahag og að sama skapi verði bætt þjónusta við aldraða sem er sífellt stækkandi hópur sem þarf að hlúa betur að.

Það hefur margt gott verið gert í borginni á liðnum árum en Reykjavík er hinsvegar ekkert öðruvísi en aðrar borgir að því leyti að það eru uppi stórar áskoranir á hverjum tíma og eitt af þeim viðvarandi verkefnum sem við er að glíma er hvernig á að mæta þeim miklu áskorunum er varðar húsnæðismálin. Þar vil ég eins og efalaust allir sjá fasteignir á viðráðanlegu verði og yngra fjölskyldufólki verði veitt sérstök athygli í þeim efnum.

Þrátt fyrir að unnið verði áfram að þéttingu byggðar í miðborginni þarf jafnhliða að vinna að heildstæðari og umfram allt fjölbreyttari lausnum í húsnæðismálum. Í þeim efnum vil ég setja fram stefnu um að skipuleggja í auknum mæli enn frekari íbúðabyggð og uppbyggingu á jaðarsvæðum borgarinnar þar sem brýn þörf er á að styrkja enn betur innviði í einstökum hverfum þannig að betra jafnvægi náist á milli einstakra borgarhluta og til þess þarf að styrkja enn frekar innviði hverfa og þá um leið mun slík ráðstöfun draga verulega út umferð á milli borgarhluta.

Mikilvægur þáttur í þessum efnum er að styrkja enn frekar í sessi íbúalýðræði með virkum hverfisráðum þar sem íbúarnir sjálfir fái aukið vægi við ákvarðanatöku um framtíðarþróun byggðarinnar, að íbúarnir sjálfir hafi meiri aðkomu og þátttökurétt í að móta nærumhverfi sitt. Stefnumörkun til 2040 í aðalskipulagi Reykjavíkurborgar eins og það liggur fyrir markast ekki að nógu og metnaðarfullri framtíðarsýn um markvissa uppbyggingu í jaðarbyggðum borgarinnar, eftirspurnin og tækifærin eru hinsvegar þar til staðar og því þarf að mæta.

Síðast en ekki síst á Reykjavíkurborg stórkostleg og ónýtt tækifæri í að bæta lýðheilsu borgarbúa sem er einn af lykilþáttum þess að bæta samfélagið eftir Covid 19 faraldurinn. Í þessum efnum vil ég sjá stórátak í að bæta útivistarsvæði í borginni og þá ekki síst í jaðri borgarinnar sem eru reyndar þegar mjög fjölsótt en ekki skipulögð til útivistar sbr. Úlfarsfellið og fleiri sambærileg og frábær útivisarsvæði. Í þessum atriðum er að stórauka upplifun með góðu skipulagi og bættu aðgengi. Þessi mál og fjölmörg fleiri brýn sem verða tíunduð síðar eru borgarmálefni sem undirritaður befur brennandi áhuga á að beita sér fyrir til að gera góða borg enn betri,“ segir í tilkynningunni frá Andrési.