Kvikmyndin Berdreymi valin til heimsfrumsýningar á Berlinale

Myndin er önnur kvikmynd Guðmundar Arnars í fullri lengd á eftir hinni margverðlaunuðu Hjartasteinn sem vakti mikla lukku meðal landsmanna og fór sigurför um kvikmyndahátíðir heims í kjölfar heimsfrumsýningar í Feneyjum 2016.

Aðstandendur hafa trú á því að myndin Berdreymi muni vekja mikla athygli.

„Þetta er grípandi mynd sem á eftir að vekja upp margar tilfinningar hjá áhorfendum, skemmtilegar, ljúfar og ógnvekjandi,“ segir Anton Máni framleiðandi myndarinnar.

„Berdreymi verður heimsfrumsýnd í Panorama flokki hátíðarinnar í Berlín, sem er lýst sem flokki fyrir heillandi og ögrandi kvikmyndir sem líklegar eru til vinsælda á meðal áhorfenda. Valið er mikill heiður þar sem Berlinale hátíðin er ein stærsta og virtasta kvikmyndahátíð í heiminum og dregur að yfir hálfa milljón manns frá yfir 130 löndum. Aðstandendur eru í skýjunum yfir þessum tíðindum og er mikil tilhlökkun fyrir að frumsýna myndina á Íslandi því þeir telja að hún eigi eftir að koma Íslendingum skemmtilega á óvar,“ segir í nýrri tilkynningu.

„Berdreymi segir frá Adda, unglingsstrák í Reykjavík sem alinn er upp af móður með skyggnigáfu. Einn daginn ákveður Addi að taka eineltisfórnarlamb undir sinn verndarvæng og inn í vinahóp slagsmálahunda. Án eftirlits, leika strákarnir sér að valdbeitingu og ofbeldi en kynnast einnig djúpri vináttu. Þegar hegðun strákana stigmagnast yfir í lífshættulega atburði, fer Addi að upplifa eigin skynjanir. Mun innsæi hans beina vinunum á öruggari braut eða munu strákarnir sökkva lengra inn í heim ofbeldis?“

Guðmundur Arnar skrifaði handritið og með helstu hlutverk fara ungstirnin Birgir Dagur Bjarkason, Áskell Einar Pálmason, Viktor Benóný Benediktsson, og Snorri Rafn Frímannsson, ásamt þeim þaulreyndu Anítu Briem, Ólaf Darra Ólafssyni og Ísgerði Gunnarsdóttur.

Framleiðandi myndarinnar er Anton Máni Svansson fyrir hönd Join Motion Pictures, en myndin er samstarfsverkefni fimm landa með meðframleiðendur frá Danmörku, Svíþjóð, Hollandi og Tékklandi.